काठमाडौं । प्रधानमन्त्री केपी शर्मा ओलीले पूर्वराजा ज्ञानेन्द्र शाह मनैदेखि जनतालाई टुक्र्याउने कोसिसमा लागेकाे बताएका छन् । सुदूरपश्चिम प्रदेशसभालाई विशेष सम्बोधन गर्दै उनले देशलाई फेरि पछाडि फर्काउने प्रयास देखिएको बताए ।
उनले भने, “फागुन ६ गते नै पूर्वराजा ज्ञानेन्द्र शाहले गरेको सम्बोधन सुनेर छक्क लाग्यो । संविधानको पनि कुरा गर्नुहुन्न त उहाँ त । कानुनको पनि कुरा गर्नुहुन्न, लोकतन्त्र, प्रणाली प्रक्रियाको कुरा गर्नुहुन्न ।”
ओलीले पूर्वराजाको क्रियाकलापले देश अफ्ठ्यारोमा पर्न लागेको बताए । “मलाई साथ दिनुस्, म आउँछु, देश बचाउँछु । देश के भएको छ ? उहाँहरूको अस्थिरताका क्रियाकलापहरूले उहाँद्वारा प्रेरित क्रियाकलापले देश अफ्ठ्यारोमा पर्दै छ,” उनले भने । “म उहाँलाई सुझाव दिन चाहन्छु– पूर्वराजाको हैसियतले, पुस्तौनी सत्ता चलाएको हैसियतले देशलाई सभ्य, सुसंस्कृत ढंगले लोकतान्त्रिक बाटोमा, लोकतान्त्रिक विधिबाट संविधान र कानुनअनुसार सञ्चालन गर्नुपर्छ भनेर सिकाउनुपर्ने ठाउँमा के चुनावमा साथ मागेको कि भोट मागेको कि के मागेको ?”
उनले राजनीतिमा आउने भए स्वागत गर्न तयार रहेको बताए । “मलाई साथ देऊ, आउँछु ! कहाँ आउने उहाँ, पोलिटिक्समा आउनुस् न हामी स्वागत गर्छौैं । अराजनीतिमा आउने कि राजनीतिमा,” ओलीले भने, “केमा साथ माग्नुभएको ? बुझिएन । अहिले बुझिएन मात्रै भनौँ ।”
प्रतिक्रिया