काठमाडौं । प्लानिङ ब्वाइज युनाइटेडले सहिद स्मारक ‘बी’ डिभिजन लिगमा विजयी सुरुवात गरेको छ ।

एन्फा मुख्यालय मैदान सातदोबाटोमा सोमबार भएको खेलमा प्लानिङ ब्वाइजले झापा फुटबल क्लबलाई २–१ गोलले हरायो । प्लानिङ ब्वाइजको जितमा फागुराम थारूले १४औँ र सुजन डंगोलले ६३औँ मिनेटमा गोल गरे ।

झापाका लागि पुजन राईले ३९औँ मिनेटमा गरेको गोल सान्त्वना बन्यो । पहिलो जितसँगै प्लानिङले तीन अंक बनाएको छ । झापाले हारबाट लिगको सुरुवात गरेको छ ।

लिगको विजेताले १५ लाख रुपियाँ, उपविजेताले १० लाख र तेस्रो हुनेले पाँच लाख रुपियाँ पुरस्कार पाउने आयोजक अखिल नेपाल फुटबल संघ (एन्फा) ले जनाएको छ ।

यस्तै ‘फेयर प्ले’ टोली र सर्वोत्कृष्ट खेलाडीलाई एक लाख तथा सर्वाधिक गोलकर्ता र उत्कृष्ट गोलरक्षकलाई जनही ५० हजार रुपियाँ पुरस्कार प्रदान गरिनेछ ।