काठमाडौं । नेकपा एमालेले आफ्नो पार्टी र सरकार वर्तमान नेपाल–भारत सम्बन्धलाई अझ प्रगाढ बनाउन प्रतिबद्ध रहेको जनाएको छ । एमाले महासचिव शंकर पोखरेलले सोमबार एक विज्ञप्ति जारी गर्दै कुनै विषय भए कूटनीतिक माध्यमबाट समाधान गरिने र बलियो विकास साझेदारी अगाडि बढाइने बताए ।

उनले परराष्ट्र नीति र बाह्य सम्बन्ध जस्ता विषयमा कुनै समाचार वा टिप्पणी प्रस्तुत गर्नुपूर्व पार्टीको आधिकारिक धारणा बुझ्न सञ्चारमाध्यमहरुलाई अनुरोध पनि गरेका छन् ।

केही स्वदेशी र विदेशी मिडियाहरुले प्रधानमन्त्री तथा एमाले अध्यक्ष केपी शर्मा ओलीले केही दिन अगाडिको जनप्रदर्शनको विषयलाई लिएर बोलेको भनिएका कुराहरु सत्य नभएको पोखरेलको भनाइ छ ।

उनले भनेका छन्, ‘यी समाचारले अनावश्क सनसनी फैलाउने एवं नेपाल र भारतबीचको युगौं पुरानो सम्बन्धमा आशंका बढाउने दुराशय बोकेका छन् ।’

नेपालको संविधान र लोकतान्त्रिक गणतन्त्र नेपाली जनताको सार्वभौम चयनको विषय भएको एमालेको भनाइ छ ।