काठमाडौं । प्रधानमन्त्री कप एकदिवसीय पुरुष क्रिकेटमा सशस्त्र प्रहरी बलको एपीएफ क्लबले कोशी प्रदेशलाई २ विकेटले हराएकाे छ ।

कोशीले दिएको २ सय ५५ रनको लक्ष्य एपीएफले ८ विकेट गुमाएर ३२ बलअघि भेटायो । एपीएफका लोकेश बमले नटआउट ८४, कप्तान रोहित पौडेलले ६१ रन बनाए । कोशीका फिर्दाेश अन्सारी र दिपेश कँडेलले ३/३ विकेट लिए ।

त्यसअघि रुपन्देहीको सिद्धार्थ रङ्गशालामा टस जितेर ब्याटिङ गरेको कोशीले ५० ओभरमा २ सय ५४ रन बनाउँदा सबै विकेट गुमायो । कोशीका शकिब हकले ६८ रन बनाए । एपीएफका अभिषेक गौतम र मौसम ढकालले ३/३ विकेट लिए ।

यो जीतसँगै एपीएफ ९ खेलमा १४ अंकसहित तालिकाको तेस्रो स्थानमा छ । एपीएफ फाइनलमा पुग्ने सम्भावना कायमै छ । भोलि हुने त्रिभुवन आर्मी क्लब र नेपाल पुलिस क्लबबीचको खेलको नतिजाले फाइनल पुग्ने अर्काे टोलीको टुङ्गो लाग्नेछ । यो खेल आर्मीले फराकिलो अन्तरले हारेमा एपीएफ फाइनल पुग्ने सम्भावना छ । आर्मी ८ खेलमा १४ अंकसहित नेट रनरेटका आधारमा दोस्रो स्थानमा छ ।

पुलिस ८ खेलमा १६ अंकसहित एक खेलअघि नै फाइनलमा पुगिसकेको छ । कोशीले ९ खेलमा २ अंकसहित पुछारमा रहेर प्रतियोगिता सकाएको छ ।