काठमाडौं । नेपाली कांग्रेसका महामन्त्री विश्वप्रकाश शर्माले राजावादीको प्रदर्शनमा भएका घटनाको नैतिक जिम्मेवारी पूर्वराजा ज्ञानेन्द्र शाहले लिनुपर्ने बताएका छन् ।

आइतबार संसद् भवन नयाँ बानेश्वरमा सञ्चारकर्मीसँगको कुराकानीका क्रममा महामन्त्री शर्माले शुक्रबारको घटनामा पूर्वराजा शाह पूणरूपमा दोषी रहेको बताए ।

पूर्वराजालाई संविधानले नागरिकलाई दिएको हकभन्दा बढी दिएर राखिएको भए पनि उनले सम्मान गर्न नसकेको शर्माको भनाइ छ ।

उनले भने, “आज पूर्वराजाले नैतिक जिम्मेवारी लिनुपर्छ कि पर्दैन ? मान्छे मारिएको घटनामा बोल्नुपर्छ कि पर्दैन ? कस्तो राजसंस्था खोजेको हो ? पत्रकारसमेत मारिँदै गर्दा दु:ख लाग्यो भनेर कुनै पत्रिकाबाट छापिने गरी विज्ञप्ति पठाउनुपर्छ कि पर्दैन ?,”

उनले मुलुकमा भएका घटनाबारे सदनमा विषय राख्न नपाउने अवस्था सिर्जना भएको भन्दै प्रधानमन्त्रीले सदनमा जवाफ दिने भनिसक्दा पनि अहिलेको अवस्थामा सदन अवरुद्ध गर्नु उचित नहुने उनको भनाइ छ ।