काठमाडौं । नेपाली कांग्रेसका महामन्त्री विश्वप्रकाश शर्माले नेपालमा संवैधानिक राजतन्त्र राख्ने प्रयासमा कांग्रेस असफल भएको बताएका छन् । तर, अब राजतन्त्र देशमा नफर्कने उनको भनाइ छ ।

सोमबार प्रतिनिधिसभामा सम्बोधन गर्दै शर्माले राजतन्त्र सक्रिय बनाएर लाभ लिएका पञ्चहरूले अहिले संवैधानिक राजतन्त्र भनिरहेको बताए । उनले विगतमा कांग्रेसले विधानमै ‘संवैधानिक राजतन्त्र’ राख्दा गोली ठोक्ने र जेल हाल्ने काम भएको बताए ।

“पूर्वपञ्चहरू, आज तपाईंहरूलाई संवैधानिक राजतन्त्र चाहियो ? हिजो कांग्रेसले संवैधानिक राजतन्त्रलाई आदर्श बनाएर त्यसका लागि लड्दै गर्दा कांग्रेसलाई गोली ठोकिएको होइन ?,” शर्माले प्रश्न गरे, “राजद्रोहको मुद्दा लगाएर जेल हालेको होइन ? सर्वस्व हरण गरिएको होइन ? तपाईंले ल्याउन चाहेको राजाले दलीय व्यवस्था निलम्बन गर्दा पनि गिरिजाबाबुले सबैलाई स्थान दिने भनेर ढुंगा खान तयार भएको होइन ?”

सांसद शर्माले नेपालमा संवैधानिक राजसंस्था भएर बस्ने योग्यता, क्षमता र चरित्र नरहेको बताए ।

‘निर्मल निवासमा पूर्वमहाराजाधिराजले लाइभ हेरिराख्नु भएको छ भने सम्झिनुहोला, तपाईंलाई गद्दीमा स्थापित गर्नका लागि कांग्रेसको सभापति त्यसबेलाको प्रधानमन्त्री गिरिजाप्रसाद कोइराला ढुंगामुढा सहेर संवैधानिक राजसंस्थालाई स्थापित गर्ने प्रयास गरिएको थियो । इतिहासको त्यो कालखण्डलाई बिपी कोइरालाले मेरो र राजाको गर्धन पनि जोडिएको छ भन्दै गर्दा राजसंस्थाको गर्धन जोगिदैन है, निरन्तर लोकतन्त्रको गर्धनमा प्रहार गर्‍यो भने भन्ने सन्देश पनि त्यसबेला राजसंस्थाले बुझेन,’ शर्माले भने, ‘अहिलेको परिस्थितिमा हाम्रो अनुभवबाट देशले बुझ्नुपर्छ, नेपालमा संवैधानिक राजसंस्था भएर बस्ने योग्यता, क्षमता र चरित्र छैन ।’

नागार्जुनको जंगलमा लगेर सामान्य नागरिकका रूपमा पूर्वराजा ज्ञानेन्द्रलाई राखे पनि चैत १५ मा चरित्र देखिएको उनले बताए ।