काठमाडौं । काठमाडौंको तीनकुने क्षेत्रमा गएको शुक्रवार भएको राजावादीको हिंसात्मक प्रदर्शन नियोजित भएको समाजवादी मोर्चाले निष्कर्ष निकालेको छ ।

बिहान माओवादी केन्द्रको केन्द्रीय कार्यालय पेरिसडाँडामा बसेको बैठकले घटना नियोजित भएको र यसको सम्पूर्ण क्षतिपूर्ति पूर्वराजा शाहले बेहोर्नुपर्ने निष्कर्ष निकालेको हो । सरकारले राजावादीहरूको योजनाबद्ध कार्यक्रमलाई कम आँकेको र त्यस घटनाको मूल्याङ्कन गरेर सरकारी संयन्त्र परिचालन गर्न चुकेको ठहर पनि गरेको छ ।

मोर्चाले दोषीमाथि कारबाही र भएका क्षतिको घटनामा संलग्नहरूबाटै क्षतिपूर्ति भराउन सरकारसँग माग गरेको छ । बैठकले गणतन्त्रको रक्षाका निम्ति सशक्त भूमिका निर्वाह गर्ने निर्णय पनि गरेको छ ।

त्यसैगरी गणतन्त्रवादीहरूको सभामा रहेको जनउपस्थिति र व्यवस्थापनका हिसाबले सानदार र भव्य रहेको र यसले गणतन्त्रवादीहरूलाई उत्साह र प्रेरणा भरेको निष्कर्ष बैठकले निकालेको छ ।

बैठकमा माओवादी अध्यक्ष प्रचण्ड, एकीकृत समाजवादीका अध्यक्ष माधवकुमार नेपाल, नेकपाका अध्यक्ष विप्लव र नेपाल समाजवादी पार्टीका अध्यक्ष महिन्द्रराय यादवलगायत चार दलका अन्य नेताहरु पनि सहभागी थिए ।