धेरैलाई आश्चर्यमा पारेर सोमबारे साइतमा प्रधानमन्त्री तथा नेकपा एमाले अध्यक्ष केपी शर्मा ओली एमालेबाटै फुटेर माधवकुमार नेपाल नेतृत्वमा बनेको नेकपा एकीकृत समाजवादी (नेकपा एस) को कार्यालयमा पाइला राखे । कुनै रमाइलो उत्सवका लागि उनी त्यहाँ पुगेका थिएनन्, औपचारिक रुपमा लेखक तथा पुराना कम्युनिष्ट कमल कोइरालाको पार्थिव शरीरमा श्रद्धाञ्जली दिन उनी त्यहाँ पुगेका थिए ।

नेकपा एसको कार्यालयमा एमाले अध्यक्ष ओली आउँदैछन् भन्ने सूचना एक घन्टाअघि नै सार्वजनिक भएको थियो । रामकुमारी झाक्रीले सामाजिक सञ्जालमार्फत उक्त सूचना सार्वजनिक गरेकी थिइन् । तर कसैले पत्याएका थिएनन् । अध्यक्ष ओली आएर श्रद्धाञ्जली दिएको र शीर्ष नेताहरुसँग भएको भेटबारे पनि झाक्रीले नै सूचना सार्वजनिक गरेकी थिइन् ।

अध्यक्ष ओलीका अर्का जानी दुश्मन भीम रावल पनि एउटै सोफामा अटाएका थिए । अध्यक्ष ओलीसँग टाँसिएर माधव नेपाल, त्यसपछि रावल बसेका थिए । ओलीसँग टाँसिएर बसेको भएपनि माधव नेपालको अनुहार कागती निचोरेको जस्तो थियो । रावल सदावहार देखिन्थे भने झलनाथ खनाल हँसिलो रुपमा प्रस्तुत भएका थिए ।

अन्य सहभागीले अध्यक्ष ओलीसँग आँखा जुधाउन नसक्ने भएकाले मोबाइलमा घोसे मुन्टो लगाएर बसेका थिए । घोसे मुन्टो लगाएर भए पनि प्रकाश ज्वालाले अध्यक्ष ओलीको आलोकनगर आगमनलाई आइसब्रेकको संज्ञा दिए ।

अध्यक्ष ओली आलोकनगर आउनुभन्दा अगाडि नै रावल त्यहाँ पुगेका थिए । सम्पर्कश्रोतले उनलाई पहिले नै त्यहाँ पु¥याएर अध्यक्ष ओलीसँग भेट गराएको हो । रावल अध्यक्ष ओलीसँग वान टु वान कुरा गर्ने मुडमा थिए, तर सम्भव भएन । सम्पर्कश्रोतमार्फत् वार्ता भइरहेको बताइएको छ । पछिल्लो समय अभियान थाँती राखेर रावल चुप बस्नुको कडी पनि यही भएको बताइन्छ ।

एसको कार्यालयमा झन्डै आधा घण्टा बिताएका ओलीले त्यहाँ गम्भीर राजनीतिक कुराकानी भएको समाचारश्रोतको दाबी छ । यो कुराकानीमा भीम रावलसमेत समेटिएका छन् । नेकपा माओवादी केन्द्रका उपाध्यक्ष नारायणकाजी श्रेष्ठलाई साक्षी राखेर गरिएको यो राजनीतिक भेटले ओली बैंककबाट फर्केपछि नयाँ तरंग दिने अनुमान गरिएको छ । केपी ओली र माधव नेपालको यसपालिको भेट सामान्य होइन, नेपाली राजनीतिमा नयाँ मोड आउन लागेको संकेत हो, सञ्चारकर्मी धु्रव लम्सालले भने ।

अध्यक्ष ओलीले कोइरालाको पार्थिव शरीरमा श्रद्धाञ्जली आर्यघाट पुगेर पनि दिन सक्थे । माधवकुमार नेपालको नाम उच्चारण गर्दा मुख कुल्ला गर्ने ओलीले श्रद्धाञ्जलीलाई बाहना बनाएर नेकपा एसका नेताहरुलाई कार्यालयमै पुगेर भेटेका छन् । राजनीतिका चतुर खेलाडी ओलीले नेकपा एसका नेताहरुलाई उनीहरुकै कार्यालयमा पुगेर भेट्नु भनेको शिकार झम्टन लागेको सिंह दुई कदम पछि सरेको अर्थ लगाइएको छ ।

अध्यक्ष ओली एउटा तिरले दुईवटा निशाना ताकेको अनुमान राजनीतिक वृत्तमा लगाइएको छ । एमालेलाई संसदमा सबैभन्दा ठूलो दल बनाउने र पार्टीको ११ औं महाधिवेशनबाट नेतृत्व पुनः कब्जा गर्न अध्यक्ष ओली दुई कदम पछि सरेको हुनसक्ने विश्लेषण गरिएको छ ।

प्रतिनिधिसभामा नेपाली कांग्रेस ८८ सिटसहित पहिलो नम्बरमा छ । ७९ सिटसहित नेकपा एमाले दोस्रो ठूलो दल हो । नेकपा एस १० सिटसहित छैटौं स्थानमा छ । नेकपा एसलाई एमालेसँग मिलाउने हो भने ८९ सिट हुन्छ, जुन कांग्रेसभन्दा १ सिट बढी हो ।

कुनै पनि दलको स्पष्ट बहुमत नहुँदा र एकभन्दा बढी दलहरु मिलेर सरकार बनाउन नसक्दा संसदको सबैभन्दा ठूलो दललाई सरकार बनाउने अवसर प्राप्त हुन्छ । यो अवसर लिनलाई अध्यक्ष ओली सक्रिय रहेको बुझिन्छ ।

पार्टीको ११ औं महाधिवेशन गर्नुपर्ने बाध्यतामा एमाले छ । पार्टी विधान धारा १३ अनुसार ६–६ महिना गरी दुई पटकमा एक वर्ष अधिवेशन पछि धकेल्न सकिन्छ । त्यसो गर्दा ०८४ मंसिर दोस्रो साताभित्र अधिवेशन गर्नुपर्ने हुन्छ । तर ०८४ मा आम निर्वाचन हुने भएकाले अधिवेशन ०८३ मै गर्न उपयुक्त हुने निष्कर्ष ओली किचेन क्याविनेटले निकालेको छ । महाअधिवेशन लगत्तै आम निर्वाचनमा गइयो भने असन्तुष्टको आत्मा भड्किने ठहर ओली समूहको छ ।

यता पूर्वराष्ट्रपति विद्यादेवी भण्डारीले महाधिवेशनको तयारी सुरु गरिसकेकी छन् । उनी राज्यको सेवा सुविधासहित यतिबेला देश दौडाह कार्यक्रममा छिन् । कोशी प्रदेशको भ्रमण सकेर उनी लुम्बिनी प्रदेशमा एमाले कार्यकर्ताको घरदैलोमा पुगेकी छन् । अध्यक्ष ओलीसँग असन्तुष्ट रहेकाहरु विद्याको सारीको फेरो समाइरहेका छन् । उनले अहिले देखाएको सक्रियता महाधिवेशनसम्म कायम रहे विद्या एमाले अध्यक्ष पक्का भन्नेहरुको जमात विस्तारै ठूलो हुँदै गएको छ ।

‘एमालेलाई संसदमा सबैभन्दा ठूलो दल बनाएर पूरै अवधि शासन गर्ने ओलीको पहिलो रणनीति हो । सत्तामै बसेर पार्टीको महाअधिवेशन गराउने रणनीतिलाई मुर्तरुप दिन नेकपा एसको कार्यालयमा ‘अध्यक्ष माधव कमरेडको कोठा कुन हो ? भन्दै खोज्न ओली बाध्य भएका हुन्’ समाचारश्रोतले भन्यो ।