काठमाडौं । काठमाडौंको तीनकुनेमा गत चैत १५ गते दुर्गा प्रसाईंको आह्वानमा राजसंस्था पुनर्स्थापनाका लागि भएको हिंसात्मक प्रदर्शन नियन्त्रणमा लिन ५८ राउन्ड गोली चलाइएको र २० जनालाई लागेर घाइते भएको प्रहरीले बताएको छ ।

प्रहरीका केन्द्रीय प्रवक्ता डिआइजी दिनेश आचार्यले बुधबार पत्रकार सम्मेलन गर्दै तीनकुने घटनामा प्रहरीको गोली लागेर घाइते भएका २० जनामध्ये ७ जना डिस्चार्ज भइसकेको बताए । १३ जना विभिन्न अस्पतालमा उपचाररत छन् ।

प्रहरीले उत्तेजित भिडलाई नियन्त्रणमा लिन तीनकुनेमा गोली चलाउनुपरेको स्पष्टीकरण दिएको छ । “स‍बै उत्तेजित भिडका कारण घटेको घटना हो । अवस्था नियन्त्रणमा लिन गोली चलाउनुपरेको हो,” पत्रकार सम्मेलनमा डीआईजी आचार्यले भने ।

गोली लागेकामध्ये १८ जना पुरूष र २ जना महिला रहेको प्रहरीले जानकारी दिएको छ ।

घटनामा प्रहरीको गोली लागेर कीर्तिपुर–४ का सविन महर्जनको मृत्यु भएको थियो । तीनकुनेनजिकै गोली लागेका उनको उपचारका लागि लैजाँदै गर्दा बाटैमा मृत्यु भएको थियो । उनको कुमनजिकै गोली लागेको अस्पतालले जानकारी दिएको थियाे ।

केन्द्रीय प्रहरी प्रवक्ताका अनुसार तीनकुने घटना नियन्त्रणमा लिन ७४६ सेल अश्रुग्यास प्रहार गरिएको थियो ।

१९८ राउन्ड व्ल्याङ् राउन्ड (गोली नभएको आवाजमात्रै निकाल्ने) चलाइएको थियो । त्यस्तै पेस्तोलबाट दुई राउन्ड गोली चलाइएको पनि प्रहरीले जानकारी दिएको छ ।

तीनकुनेमा आगजनी भएको घरमा एभिन्युज टेलिभिजनका पत्रकार सुरेश रजक मृत फेला परेका थिए । उनको जलेर मृत्यु भएको पोस्टमर्टमले देखाएको छ ।