काठमाडौं । प्रधानमन्त्री केपी शर्मा ओलीले आज दिउँसो मन्त्रिपरिषद् बैठक बोलाएका छन्। प्रधानमन्त्री तथा मन्त्रिपरिषद्को कार्यालय, सिंहदरबारमा अपराह्न ३ बजेका लागि बैठक आह्वान गरिएको प्रधानमन्त्रीको सचिवालयले जानकारी दिएको छ।

बैठकमा सरकारका नियमित कामकाजसँगै केही महत्त्वपूर्ण नियुक्ति, बढुवा लगायतका विषयमा निर्णय हुने बताइएको छ। हालै सम्पन्न थाइल्याण्ड भ्रमणको समीक्षा पनि बैठकको कार्यसूचीमा परेको जनाइएको छ।

बैठकमा नेपाल राष्ट्र बैंकको नयाँ गभर्नर नियुक्तिको विषयमा समेत छलफल हुने भएको छ। गभर्नर नियुक्तिको दौडमा अन्य धेरै पात्रहरू पनि सक्रिय छन्। यस पटक गभर्नरको जिम्मेवारी नेपाली काँग्रेसको भागमा परेको छ, हाल एमाले-कांग्रेस गठबन्धनको संयुक्त सरकार रहेको सन्दर्भमा यो चर्चा चुलिएको हो।

यसैबीच, नेपाल शिक्षक महासंघको आन्दोलनबारे पनि आजको बैठकमा छलफल हुने भएको छ। विद्यालय शिक्षा ऐन तुरुन्त जारी गर्नुपर्ने माग राख्दै महासंघले बुधबारदेखि राजधानीमा सडक आन्दोलन शुरु गरेको छ। सरकारले वार्तामा आउन आग्रह गरे पनि शिक्षकहरू वार्तामा नबसी आन्दोलनमै रहेको मन्त्रीहरूले बताएका छन्।

शिक्षकहरूले पुराना सहमतिहरू कार्यान्वयन नभएको भन्दै शैक्षिक हड्ताल घोषणा गरेका छन्। आन्दोलन चर्किँदै गएसँगै सरकारले समस्याको समाधान खोज्ने प्रयास स्वरूप मन्त्रिपरिषद् बैठकमार्फत आवश्यक निर्णय लिन सक्ने अनुमान गरिएको छ।