सप्तरी । सप्तरीको कञ्चनरुप नगरपालिका–८ कञ्चनपुरमा ४८ वर्षीय श्यामकुमार गुप्ता आफ्नै ओछ्यानमा मृत फेला परेका छन् । इलाका प्रहरी कार्यालय कञ्चनपुरका डिएसपी माधवप्रसाद काफ्लेका अनुसार बिहीबार बिहान १० बजे गुप्ताको छोरीले उठाउन खोज्दा उनी मृत अवस्थामा भेटिएका थिए ।

घटना शंकास्पद देखिएपछि प्रहरीले मृतककी श्रीमती गुञ्जा गुप्तालाई नियन्त्रणमा लिएको छ । शव पोस्टमार्टमका लागि गजेन्द्र नारायण सिंह अञ्चल अस्पताल, राजविराज पठाइएको छ ।

प्रहरीका अनुसार गुप्ता अत्यधिक मदिरा सेवन गर्ने गर्थे । स्थानीयले गुञ्जा मानसिक असन्तुलन रहेको र मृत्युमा उनको संलग्नता हुन सक्ने आशंका गरेका छन् । मृत्युको कारण पत्ता लगाउन प्रहरीले विभिन्न कोणबाट अनुसन्धान थालेको छ ।