काठमाडौँ । नेपाल क्रिकेट संघ (क्यान) भित्रको आन्तरिक विवादले चर्को रूप लिएको छ, जसमा उपाध्यक्ष रोशन सिंहसहित आठ जना बोर्ड सदस्यले अध्यक्ष चतुरबहादुर चन्दलाई गुहार्दै क्यानको वर्तमान कार्यशैली, पारदर्शिता र निर्णय प्रक्रियामाथि गम्भीर प्रश्न उठाएका छन्। केही दिनअघि अध्यक्षलाई लेखिएको पत्रमा नाम नखुलाइए पनि, आरोपहरू क्यानका प्रभावशाली सचिव पारस खड्काप्रति लक्षित देखिन्छन्, जसले हालै सम्पन्न नेपाल प्रिमियर लिग (एनपीएल) को पहिलो संस्करणमा मुख्य भूमिका खेलेका थिए र क्यानका अधिकांश गतिविधिमा उनको नेतृत्वदायी उपस्थिति रहँदै आएको छ।

ध्यानाकर्षण गराउने सदस्यहरूमा प्रदीप मजगैया, दुर्गाराज पाठक, विक्रम विष्ट, माधव कर्मचार्य, वीरेन्द्र चन्द, अर्जुन पौडेल र जयन्ती भट्ट पनि समावेश छन्। उनीहरूले क्यानका प्रयासहरू संस्थागत नभई व्यक्तिगत स्वार्थमा केन्द्रित भएको, एनपीएलको हिसाबकिताब पारदर्शी नभएको र बोर्डबाट अनुमोदन नभएको, तथा नेपाल र वेस्ट इन्डिजबीचको टी-२०आई शृंखलाका बारेमा बोर्डलाई जानकारी नदिएको जस्ता आरोप लगाएका छन्।

यी बोर्ड सदस्यहरूले क्यानबाट हुने निर्णयहरू स्पष्ट, खुला र संस्थाको विधि-विधानअनुसार हुनुपर्नेमा जोड दिँदै, यदि ध्यानाकर्षण पत्रलाई बेवास्ता गरिएमा आगामी दिनमा आउन सक्ने सम्भावित परिस्थितिको जिम्मेवारी आफूहरूले नलिने चेतावनीसमेत दिएका छन्, जसले क्यानभित्रको यो विवाद थप गहिरिने संकेत गरेको छ।