काठमाडौं । नवगठित प्रगतिशील लोकतान्त्रिक पार्टीका नेता जनार्दन शर्माले कांग्रेस, एमाले र माओवादी केन्द्रले आफ्नो क्रान्तिकारी छवि बचाउन नसक्दा मुलुक चरम भ्रष्टाचार र परिणामविहीन अवस्थामा पुगेको आरोप लगाएका छन् ।

आइतबार काठमाडौंमा आयोजित प्रगतिशील लोकतान्त्रिक पार्टी राष्ट्रिय एकता घोषणा सभालाई सम्बोधन गर्दै शर्माले उक्त कुरा बताए । यी तीन पार्टी लामो समय सत्तामा रहे पनि सामाजिक विभेद, प्रशासनिक सुधार र विकासका आधारभूत मुद्दाहरूलाई पर्याप्त प्राथमिकता नदिँदा मुलुक असफल बन्न पुगेको आरोप लगाए ।

‘कांग्रेस, एमाले र माओवादी आआफ्नो समयका नागरिकको प्रतिनिधित्व गर्ने परिवर्तनकारी पार्टी नै थिए र हुन् । परन्तु इतिहासमा योगदान गरेका दलहरूले राज्यसत्तामा पुगेपछि आफ्नो क्रान्तिकारी छवि बचाउन नसक्दा असफल सिद्ध हुन पुगे । फलतः देश चरम भ्रष्टाचार, विकृति र चरम यथास्थितिका कारण गति र परिणामविहीन हुन पुग्यो ।’ शर्माले भने ।

उनले थपे, ‘नेपाली कांग्रेस ४५ वर्ष, नेकपा (एमाले) ३६ वर्ष, नेकपा (माओवादी केन्द्र) ले करिब १७ वर्ष सरकार चलाए वा सत्ताको वरिपरि नै रहे । परन्तु हजारौँ वर्षसम्म विकासको परम शत्रुको रूपमा रहेको सामाजिक उत्पिडन मूलतः जातीय, क्षेत्रीय, लैंगिक र वर्गीय विभेदको सम्बोधन गर्न दलहरू असफल भए । नेपालको विकासका लागि नीतिगत र प्रणालीगत पुर्नसंरचना गर्नुको साटो मौजुदा संस्कृति संरचनाको उपयोग गर्दै मुलुकलाई थप बर्बादीतर्फ धकेले ।’

प्रमुख राजनीतिक दलहरूले सुशासन र संरचनागत सुधारमा अपेक्षित परिणाम दिन नसकेको उनको टिप्पणी छ । मुलुकको विकासका लागि नीतिगत र प्रणालीगत पुनर्संरचना गर्नुको सट्टा मौजुदा संरचनाको दुरुपयोग गर्दै मुलुकलाई थप बर्बादीतर्फ धकेलेको उनको आरोप छ ।

शर्माले पार्टीगत हितलाई भन्दा दीर्घकालीन संस्थागत सुधार, पारदर्शिता र उत्तरदायित्वमा ध्यान दिन सबै राजनीतिक शक्तिहरू जिम्मेवार हुनुपर्ने आवश्यकता औँल्याए ।