काठमाडौं । नेकपा (एमाले) केन्द्रीय सदस्य उषाकिरण तिमिल्सिनाले आफूले चार वर्षको अवधिमा ६ मिनेट मात्र बोल्न पाएको बताएकी छन् ।

नेकपा एमालेको ११औं महाधिवेशनका विषयमा मंगलबार (मंसिर २३) काठमाडौंको बागबजारस्थित होटल हार्दिकमा आयोजित अन्तरसंवाद कार्यक्रममा बोल्दै उनले यस्तो बताएकी हुन् ।

लामो समयदेखि लोकतान्त्रिक विधि र पद्धतिलाई अनुसरण गर्दै आएको पार्टीले आन्दोलनको संस्कार र संस्कृतिको खिल्ली उडाएको उनको टिप्पणी छ ।

आफू कारबाहीमा समेत परेको स्मरण गर्दै उनले भनिन्, “म विगत चार वर्ष केन्द्रीय सदस्य हुँदा मेलै बोल्न पाएको समय जम्मा ६ मिनेट हो । त्यो पनि दुईचोटि केन्द्रीय कमिटी बैठकमा । हामीले ल्याएको गणतन्त्र त्यो खालको होइन कि, चार वर्षको अवधिमा जम्मा ६ मिनेट बोल्न पाउने ? पार्टीभित्र बोल्ने ठाउँ कहाँ छ ? निश्चित नेताले मनपरी बोल्ने ठाउँका रूपमा अभ्यास गरिँदै आइयो ।”

पार्टी अध्यक्ष प्रधानमन्त्रीको कुर्सीमा बसेर जनतालाई ललकार्ने काम भएको उनको भनाइ छ ।