काठमाडौं । अन्तरिम सरकारकी प्रधानमन्त्री सुशीला कार्कीले देशलाई बंगलादेश बन्न दिन नहुने बताएकी छन् । आज बाह्रखरी कथा प्रतियोगिताका विजेता घोषणा तथा पुरस्कार वितरण समारोहलाई सम्बोधन गर्दै उनले नेपाललाई बंगलादेश बनाउन दिन नहुने बताइन् ।

प्रधानमन्त्री कार्कीले अन्तरिम सरकार अचानो जस्तो बनेको टिप्पणी गरिन् । उनले राजनीतिक दल र नवयुवाका समूहले दिनदिनै सरकार छोड् भन्दै गालीगलौज गर्ने गरेको बताइन् । उनले सबैतिरबाट गाली आएको भन्दै दिक्दारी व्यक्त गरिन् ।

उनले भनिन्, ‘हामी अचानो जस्तो पो रहेछौँ । राजनीतिक दलले पनि गाली गर्छ । अहिले छोड्, भोलि छोड् भन्छ । जेनजीले पनि आजै छोड्, भोलि छोड्, पर्सि छोड् भन्छ । छोडौँ भने के छोडौँ ? हामी त पेण्डुलम जस्तो भयौँ । त्यही पनि सकस गरेर, मेहनत गरेर, बहुत धैर्य धारण गरेर काम गर्दैछौँ । देश बङ्गलादेश नहोस् भन्ने सुरमा हामी छौँ ।’

प्रधानमन्त्री कार्कीले कतै जाँदा पनि सुख नहुने अवस्थामा आफूहरू रहेको बताइन् ।