काठमाडौं । राष्ट्रिय मानवअधिकार आयोगले औसतमा वार्षिक ३५१ मानव बेचबिखनका घटना हुने गरेको तथ्य सार्वजनिक गरेको छ । मानव बेचबिखन विरुद्धको अधिकारसम्बन्धी प्रतिवेदन सार्वजनिक गर्दै आयोगले यस्तो बताएको हो । आयोगले नेपालका ७७ मध्ये ७० जिल्लामा यस्ता घटना भइरहेको बताएको छ ।

कार्यक्रममा आयोगका अध्यक्ष तपबहादुर मगरले मानव बेचबिखन तथा ओसारपसारसम्बन्धी मुद्दाहरू अदतलालबाट छिटो फैसला हुनुपर्ने बताए । यस्ता घटनाको न्याय निरूपणमा विलम्ब भएको उनको भनाइ छ ।

मानव बेचबिखन तथा ओसारपसार नियन्त्रणमा सरकारले प्रभावकारी काम गर्न नसकेको अध्यक्ष मगरले उल्लेख गरे ।

यस्ता घटना रोक्न विपन्नको आर्थिक सुधार, रोजगारी सिर्जना र जनचेतना अभिवृद्धिमा सरकार अझै क्रियाशील हुनुपर्ने उनले बताए । ”यो गम्भीर अपराध नियन्त्रणको काम सरकारको हो । आयोगले यस विरुद्ध गर्नुपर्ने कामबारे सरकारलाई सिफारिस गरेका छौँ । सरकारले त्यसको प्रभावकारी कार्यान्वयन गर्नुपर्‍यो,” उनले भने ।

आयोगका सिफारिस कार्यान्वयन नहुँदासम्म मानव बेचबिखन न्यूनीकरण नहुने उनले बताए । रोजगारीको प्रलोभनमा पार्दै नेपालीहरूलाई विदेशमा लगेर अवैध कल सेन्टरमा काम लगाउने, महिलाहरूको डिम्ब तस्करी गर्ने तथा रात्रिकालीन व्यवसायमा लगाउने गरेको पाइएको आयोगको प्रतिवेदनमा उल्लेख छ ।

यस्तै, लामा पढाउने नाममा बालकहरूको तस्करी हुने गरेको समेत प्रतिवेदनमा उल्लेख छ । पछिल्लो समय चिनियाँहरूसँग विवाह गर्ने प्रलोभनमा पनि धेरै नेपालीहरू बेचबिखनमा परेको अयोगले जनाएको छ । आयोगका अनुसार परम्परागतसँगै मानव बेचबिखनका नयाँ आयामहरू समेत थपिएका छन् ।