काठमाडौँ । पूर्वी नवलपरासी (नवलपुर)को गैँडाकोट नगरपालिका वडा नम्बर १५ चिन्तामणी टोलमा बाबुले छोराको हत्या गरेका छन् ।

६३ वर्षीय डम्मर गिरीले गए राति अन्दाजी १० बजे ४३ वर्षीय छोरा शंकर गिरीको हत्या गरेको नेपाल प्रहरीले जनाएको छ । घरायसी विवादमा उनले छोरामाथि धारिलो हतियार (खुर्पा) प्रहार गरेका थिए ।

खुर्पा प्रहारबाट टाउकोमा गम्भीर चोट लागेका शंकरको चितवनको भरतपुरस्थित नयाँ मेडिकल कलेजमा उपचारको क्रममा राति १०:४५ बजे मृत्यु भएको हो ।

घटनाको जानकारी पाउनसाथ प्रहरी टोली तत्काल घटनास्थलमा खटिएको थियो । प्रहरीले घटनास्थलबाटै खुर्पा बरामद गर्नुका साथै छोराको हत्यामा संलग्न बुबा डम्मर गिरीलाई नियन्त्रणमा लिएको छ । पक्राउ परेका गिरीमाथि हिरासतमा राखी अनुसन्धान भइरहेको प्रहरीले जनाएको छ ।