बारा । बाराको निजगढ नगरपालिकास्थित भमरामा आज (बुधबार) दिउँसो मोटरसाइकल एकआपसमा ठोक्किँदा दुई जनाको मृत्यु भएको छ । सो दुर्घटनामा एक जना घाइते भएका छन् ।

रौतहटबाट निजगढतर्फ आउँदै गरेको बा ९७ प ९४४ नम्बरको मोटरसाइकल र विपरित दिशाबाट रौतहट जाँदै गरेको प्रदेश १–०५ ००१ प ५४९७ नम्बरको मोटरसाइकल एकआपसमा ठोक्किएर दुर्घटना भएको हो । दुर्घटनामा मृत्यु हुने दुवै जना मोटरसाइकल चालक भएको ईलाका प्रहरी कार्यालय निजगढले जनाएको छ ।

मृत्यु हुनेमा बा ९७ प ९४४ नम्बरका मोटरसाइकल चालक बाग्मती ३ का ३१ वर्षीय बुद्धिबहादुर बल र प्रदेश १–०५ ००१प ५४९७ नम्बरका मोटरसाइकल चालक उदयपुर कटारी-२ का ३४ वर्षीय चन्द्रदिप लामा रहेका छन् ।

बलको मोटरसाइकलमा सवार २९ वर्षीय बाबुराम सुनुवार घाइते भएका छन् । घाइते सुनुवारको निजगढ सामुदायिक अस्पतालमा उपचार भइरहेको छ । घटनाबारे थप अनुसन्धान भइरहेको ईलाका प्रहरी कार्यालय निजगढले जनाएको छ ।