काठमाडौं । पोर्चुगिस युवा खेलाडी फाबियो कार्भाल्हो ब्रेन्टफोर्डमा अनुबन्ध भएका छन् ।

ब्रेन्टफोर्डले कार्भाल्होलाई लिभरपुलबाट क्लबमा भित्र्याएको हो । ब्रेन्टफोर्डले कार्भाल्होलाई भित्र्याउन २७.५ मिलियन पाउन्ड स्टर्लिङ डलर खर्चिएको बीबीसीले जनाएको छ । २१ वर्षीय कार्भाल्होले ब्रेन्टफोर्डसँग पाँच वर्षको सम्झौता गरेका छन् ।

कार्भाल्होले गत सिजन जर्मन बुन्डेसलिगा क्लब आरबी लाइपजिङ र त्यसपछि हल सिटीबाट लोन खेलेका थिए । सन् २०२२ मा फुलहामबाट लिभरपुलमा अनुबन्ध भएका कार्भाल्होले लिभरपुलबाट २१ खेल खेल्दा ३ गोल गरेका छन् । सन् २०२३-२४ को सिजनको अन्त्यतिर हल सिटी पुगेका कार्भाल्होले २० खेलमा ९ गोल गरेका थिए ।

प्रि-सिजनका खेलमा लिभरपुलको जर्सीमा कार्भाल्होले आर्सनल र म्यानचेस्टर युनाइटेडविरुद्ध गोल गरेका थिए ।