काठमाडाैँ । भक्तपुरको गठ्ठाघरमा ट्रकले स्कुटरलाई ठक्कर दिँदा स्कुटरमा सवार यात्रुको ज्यान गएपछि अहिले अवस्था तनावगग्रस्त बनेकाे छ ।

जिल्ला प्रहरी परीसर भक्तपुरका अनुसार कोटेश्वरबाट भक्तपुर जाँदै गरेको ना ६ ख २१७३ नम्बरको ट्रकले बिहीबार दिउँसो २ बजे आसपासमा बा ४९ प ८९४४ नम्बरको स्कुटरलाई ठक्कर दिँदा एक महिलाको ज्यान गएको हो । ज्यान गुमाउने व्यक्तिको पहिचान खुलिसकेको छैन ।

अहिले घटनास्थल तनावग्रस्त रहेको र सडक अवरुद्ध भएको छ । घटनास्थलमा अहिले प्रहरी र विराेध प्रदर्शनमा उत्रिएकाहरुबीच झडप भएकाे छ । विराेध प्रदर्शनमा उत्रिएकाहरुले प्रहरीमाथि ढुंगामुढा गरेका छन् । दुर्घटनापछि ट्रकमा तोडफोड गरिएको छ ।

प्रत्यक्षदर्शीका अनुसार कौशलटारबाट गठ्ठाघरतर्फ गइरहेको ट्रकले स्कुटरलाई ठक्कर दिएपछि निकै परसम्म सोहोरेर लगेको थियो । ट्राफिक प्रहरीले ओभर स्पिडमा कौशलटारबाट गठ्ठाघरतर्फ गइरहेको स्कुटरलाई राेक्न खाेज्दा पछाडिबाट आएकाे ट्रकले ठक्कर दिँदा दुर्घटना भएकाे एक प्रत्यक्षदर्शीले बताए ।