नेपिड । म्यानमारमा शक्तिशाली समुद्री आँधी यागीका कारण कम्तीमा ७४ जनाको मृत्यु भएको छ । कयौँ अझ बेपत्ता रहेको बताइएको छ । यागीसँग आएको मुसलधारे वर्षा, बाढी र पहिरोमा परेर जाँदा ठुलो सङ्ख्यामा हताहत भएको त्यहाँको सरकारी सञ्चार माध्यमले आइतबार भनेको छ ।

बाढीका कारण ४५० गाउँ र वडा डुबानमा परेको म्यानमार न्युज एजेन्सी (एमएनए)ले भनेको छ । बेपत्ता ८९ जनको खोजीकार्य र उद्धारको काम भइरहेको बताइएको छ । आँधीका कारण ६५ हजार घर ध्वस्त भएको एमएनएले भनेको छ ।

यागी यसवर्ष एसियामा आएको सबैभन्दा शक्तिशाली समुद्री आँधी हो । यसले दक्षिण चीनदेखि फिलिपिन्स र भियतनाम हुँदै म्यानमारमा उत्पात मच्चाएको छ ।

भियतनाममा यो आँधीका कारण मर्नेको संख्या २२६ पुगेको थियो । गत हप्ता थाइल्यान्डमा पनि ९ जनाको मृत्यु भएको थियो ।