काठमाडौं । सुदूरपश्चिम रोयल्सले नेपाल प्रिमियर लिग (एनपीएल) का लागि न्युजिल्याण्डका बलिङ अलराउन्डर स्कट कुगेलेइनलाई अनुबन्ध गरेको छ ।

बुधबार विज्ञप्ति जारी गरी सुदूरपश्चिम रोयल्सले न्युजिल्याण्डका बलिङ अलराउन्डर कुगेलेइनलाई अनुबन्ध गरेको जानकारी दिएको हो । न्युजिल्याण्डका लागि टेस्ट, ओडीआई र टी-२०आई तीनै फर्म्याटमा खेलेका स्कटले पछिल्लोपटक यसै वर्ष मार्चमा अष्ट्रेलियाविरुद्ध टेस्ट खेलेका थिए । सुदूरपश्चिमले स्कटको आगमनले टिमको बलिङ थप मजबुत हुने विश्वास व्यक्त गरेको छ ।

तीव्र गतिको बलिङ गर्ने स्कटसँग तल्लोक्रममा ठूला सट खेल्ने क्षमता छ । स्कटसँग विश्वका क्रिकेटको शीर्ष फ्रेन्चाइज लिग खेलेको अनुभव छ । उनले सन् २०११ देखि प्रथम श्रेणी क्रिकेट खेल्दै आएका छन् । स्कटले टी-२० क्रिकेटमा २६ को औसतले १ सय ६८ विकेट लिएका छन् भने १ हजार २२ रन जोडेका छन् । यसबाहेक प्रथम श्रेणी क्रिकेटमा उनले २७ को औसतमा रन जोड्दै ४ शतक र १८ अर्धशतक प्रहार गरेका छन् ।