काठमाडौं । नेपाली कांग्रेस र नेकपा एमालेका शीर्ष नेताहरूबीच अहिले बालुवाटारमा छलफल जारी छ ।

मन्त्रिपरिषद् फेरबदल हुने चर्चाका बीच बसेकाे बैठकमा एमालेबाट प्रधानमन्त्री एवम् पार्टी अध्यक्ष केपी शर्मा ओली, अर्थमन्त्री विष्णु पाैडेल र प्रधानमन्त्रीका प्रमुख राजनीतिक सल्लाहकार विष्णु रिमाल सहभागी छन् ।

यस्तै कांग्रेसबाट सभापति शेरबहादुर देउवासहित परराष्ट्रमन्त्री आरजु राणा देउवा तथा महामन्त्री गगन थापा सहभागी रहेको बालुवाटार स्राेतले जानकारी दिएको छ ।

प्रधानमन्त्री एवम् एमाले अध्यक्ष केपी शर्मा ओली र कांग्रेस सभापति शेरबहादुर देउवाबीच सोमबार पनि छलफल भएको थियो ।

प्रधानमन्त्री ओलीले आसन्न चीन भ्रमणअघि नै मन्त्रिपरिषद् हेरफेर गर्ने चर्चा राजनीतिक वृत्तमा छ ।

त्यसैगरी अहिले साँझ बोलाइएको मन्त्रिपरिषद् बैठक स्थगित गरिएको छ । प्रधानमन्त्री ओलीले साँझ ६ बजे मन्त्रिपरिषद् बैठक बोलाएका थिए ।