लन्डन । म्यानचेस्टर युनाइटेडको इङलिश प्रिमियर लिगमा खराब प्रदर्शन जारी रहेको छ । आइतबार सम्पन्न खेलमा बोर्नमाउथले म्यानचेस्टर युनाइटेडलाई ३-० गोल अन्तरले पराजित गरेको हो । 

बोर्नमाउथको जितमा डीन हुजीसेन, जस्टिन क्लुइभर्ट र एन्टोनी सेमेनियोले एक एक गोल गरेका थिए । यो जितपछि बोर्नमाउथको १७ खेलमा २८ अंक भएको छ र लिगमा पाँचौं स्थानमा उक्लिएको छ ।

त्यस्तै म्यानचेस्टर युनाइटेडको भने यस सिजनमा यो सातौं हार हो । यो हारपछि म्यानचेस्टर युनाइटेड १७ खेलमा २२ अंकसहित १३औं स्थानमा झरेको छ ।   

टोटनह्यामको पोष्टमा लिभरपुलको ६ गोल

लिभरपुलले इङ्लिस प्रिमियर लिगमा आफ्नो सानदार प्रदर्शनलाई निरन्तरता दिएको छ। आइतबार राति सम्पन्न खेलमा लिभरपुलले टोटनह्यामको पोष्टमा ६ गोल गरेको छ। सो खेल लिभरपुलले ६-३ गोल अन्तरले जितेको थियो।

लिभरपुलका लागि मोहमद सालाह र लुइस डियाजले २-२ गोल गरेका थिए भने एलेक्सिस म्याक एलेस्टर र डोमिनिक जोबोस्लाईले १-१ गोल गरेका थिए। त्यसैगरी, टोटनह्यामका लागि जेम्स म्याडिसन, डेजान कुलुसेभ्सकी र डोमिनिक सोलांकले गोल गरेका थिए ।

यो जितपछि लिभरपुलको १६ खेलमा ३९ अंक भएको छ र लिगको शीर्ष स्थानमा कायम रहेको छ। त्यसैगरी टोटनह्यामको भने यस सिजनमा यो आठौं हार हो। यो हारपछि टोटनह्यामको १७ खेलमा २३ अंक रहेको छ र लिगमा ११औं स्थानमा झरेको छ।