काठमाडौं । नेपाली कांग्रेसका पूर्वमहामन्त्री शशांक कोइरालाले आफ्नो मात्रै चिन्ता गरेर राजनीति नचल्ने बताएका छन् । उनले बिपी कोइरालाको विचारअनुसार अघि बढ्न जरूरी रहेको पनि बताए ।

कांग्रेस रामेछाप–काठमाडौं सम्पर्क समितिले बुधबार काठमाडौंमा गरेको कार्यक्रममा बोल्दै कोइरालाले भने, ‘मान्छेले आफूबाट निस्किएर गएपछि मात्र राजनीतिक सुरू हुन्छ, आफ्ना बारेमा चिन्ता गरेर राजनीति चल्दैन ।’

उनले बिपी कोइरालालाई मानिसहरूले स्मरण गरिराख्ने उल्लेख गर्दै भने, ‘आज पनि मान्छेले बीपी कोइरालालाई किन सम्झिन्छन्, उहाँ करोडपति वा अर्बपति त हुनुहुन्नथ्यो। उहाँले आफ्नो जीवन यस्तो प्रयोग गर्नुभयो, आफ्नो जीवन अरूका लागि व्याप्त गर्नुभयो ।’

साथै कोइरालाले देशको विकास र समृद्धिका लागि सबैले हातेमालो गर्दै अघि बढ्नुपर्ने बताए ।