धनगढी । सुदूरपश्चिम प्रदेशले प्रधानमन्त्री कप महिला टी–२० राष्ट्रिय क्रिकेट प्रतियोगितामा लगातार तेस्रो जीत हासिल गरेको छ ।

धनगढीको फाप्ला क्रिकेट मैदानमा आज भएको खेलमा सुदूरपश्चिमले कर्णाली प्रदेशलाई १० विकेटले हरायो । कर्णालीले दिएको २१ रनको लक्ष्य सुदूरपश्चिमले १ विकेट पनि नगुमाई ९ बलमै भेटायो । सुदूरपश्चिमकी कविता कुँवरले १४, मनिषा बोहराले ५ रन बनाइन् ।

यसअघि टस हारेर ब्याटिङको निम्तो पाएको कर्णालीले निर्धारित ५ ओभरमा ७ विकेट गुमाएर २० रन बनायो । कर्णालीका कुनै पनि खेलाडीले दोहोरो अंकमा रन बनाउन सकेनन् । कर्णालीकी श्रुती बुढाले सबैभन्दा धेरै नटआउट ८ रन बनाइन् । सुदूरपश्चिमकी आशिका महराले ३, कविता कुँवरले २, ऋतु कनौजियाले १ विकेट लिइन् ।

सुदूरपश्चिम ३ खेलमा ६ अंकसहित समूह ‘ए’ को शीर्ष स्थानमा उक्लिएको छ । कर्णाली ३ खेलमा १ अंकसहित पुछारमा छ । प्रतियोगितामा अहिले समूह ‘ए’ कै गण्डकी प्रदेश र लुम्बिनी प्रदेश खेलिरहेका छन् ।