काठमाडौं । प्रधानमन्त्री कप महिला राष्ट्रिय टी–२० क्रिकेट प्रतियोगितामा सोमबार बागमती प्रदेश र कोशी प्रदेश विजयी भएको छ ।

धनगढीस्थित फाप्ला क्रिकेट मैदानमा भएको पहिलो खेलमा बागमतीले त्रिभुवन आर्मी क्लबलाई १४ रनले हरायो । यस्तै अर्को खेलमा कोशीले मधेश प्रदेशलाई ४७ रनले पराजित गरेको छ ।

पहिलो खेलमा मौसमका कारण १५ ओभरमा झारिएको खेलमा जितका लागि ८२ रनको लक्ष्य पछ्याएको आर्मी १३.२ ओभरका सवै विकेटको क्षतिमा ६७ रनमा समेटिएको थियो । यसअघि पहिले ब्याटिङ गरेको बागमतीले निर्धारित १५ ओभरका दुई विकेटको क्षतिमा ८१ रनको योगफल खडा गरेको थियो ।

यस्तै अर्को खेलमा कोशीले दिएको एक सय ७ रनको लक्ष्य पछ्याएको मधेश निर्धारित २० ओभरमा नौ विकेटको क्षतिमा ५९ रनमा समेटियो ।

यसअघि पहिले ब्याटिङ गरेको कोशीले निर्धारित ओभरमा पाँच विकेटको क्षतिमा एक सय ६ रन बनाएको थियो ।