काठमाडौं । पूर्वपञ्चहरुको दल भनेर चिनिने राष्ट्रिय प्रजातन्त्र पार्टी (राप्रपा) भित्र आन्तरिक विवाद उत्कर्षमा पुगेको छ ।राप्रपाको जारी केन्द्रीय समितिमा अध्यक्ष राजेन्द्र लिङदेन र महामन्त्री धवलशमशेर जबराबीचको विवाद छताछुल्ल भएको हो ।

शनिबारको बैठकमा राणाले अध्यक्ष लिङदेनको आलोचना गरेकामा विरोध भएको छ । शुक्रबारको बैठकमा राणाले फरक राजनीतिक विचार प्रस्तुत गरेका थिए । उनले अध्यक्ष लिङदेनको कार्यशैलीप्रति रोष प्रकट गरेका थिए । राणाका तर्फबाट नेतृ कुन्तीकुमारी शाहीले बचान गरेर सुनाएको दस्तावेजप्रति शनिबारको बैठकमा बोल्ने लिङदेन पक्षीय नेताहरुले चर्को विरोध गरे ।

उक्त दस्तावेजले पार्टीलाई विभाजनको बाटोमा लैजाने तर्क लिङदेन पक्षको छ । सो पक्षले राणालाई कतैबाट परिचालित भएको आरोपसमेत लगाए । देशभर पार्टीका पक्षमा वातावरण बनिरहेका बेला रााणाले अनावश्यक बखेडा झिकेको भन्दै केही नेताले कारबाहीको समेत माग गरेका छन् ।

बैठकमा राणाले लिङदेनको निष्ठामाथि प्रशन उठाएकामा सहमहामन्त्री धनबहादुर बुढाले तीव्र आपत्ति जनाए । गणतन्त्रवादी एमालेबाट आएका राणाले आजीवन राजावादी राजनीति गरेका लिङदेनको निष्ठामा प्रश्न उठाउनु अनैतिक भएको आरोप उनले लगाए ।

वरिष्ठ नेताहरु लोकेन्द्रबहादुर चन्द पशुपतिशमशेर राणा, डा. प्रकाशचन्द्र लोहनी गणतन्त्रका पक्षमा उभिएका बेलासमेत लिङदेन राजसंस्थाको पक्षमा उभिएको नबिर्सन बुढाले आग्रह गरे ।

अर्का सह–महामन्त्री प्रकाश रिमालले पार्टीलाई पुनः विभाजन गर्ने षड्यन्त्र सुरु भएको रुपमा राणाको दस्तावेजलाई लिनुपर्ने बताए । लिङ्देन पार्टी नेतृत्वमा आएपछि पार्टीको पक्षमा देशभर आकर्षण बढेका बेला नेतृत्व कमजोर बनाउने काम भएको टिप्पणी गरे ।

राणाले प्रचण्ड नेतृत्वको सरकारमा लिङ्देन सहभागी भएकामा आपत्ति जनाए । रिमालले आफैँ समेत सहभागी केन्द्रीय समिति बैठकले प्रचण्ड सरकारमा जाने निर्णय गर्दा किन असहमति नजनाएको भन्दै राणासँग प्रश्न गरे । बैठकमा आइतबार पनि केन्द्रीय सदस्यहरुले बोल्ने क्रम जारी रहने सो पार्टीले जनाएको छ ।