मे महिनादेखि गाजामा खाना खोज्दै गर्दा ७९८ प्यालेस्टिनीहरूको मृत्यु भएको छ । संयुक्त राष्ट्रसंघले मे महिनादेखि गाजामा इजरायली सेनाद्वारा खाना खोजिरहेका ७९८ प्यालेस्टिनीहरूको हत्या गरेको खुलासा गरेको हो । संयुक्त राष्ट्रसङ्घीय मानव अधिकार कार्यालय (ओएचसीएचआचर) ले मे महिनाको अन्त्यदेखि गाजामा खाना प्राप्त गर्ने प्रयास गर्दा कम्तिमा ७९८ प्यालेस्टिनीहरूको मृत्यु भएको जनाएको छ ।

अन्तर्राष्ट्रिय सञ्चार माध्यमका अनुसार गाजाको अस्पताल अगाडि पोषणयुक्त खानेकुराका लागि लाइनमा बसिरहेका १५ प्यालेस्टाइनीको इजरायली आक्रमणबाट मृत्यु भएको छ । यसरी मारिने मध्य आठ बच्चा तथा दुई महिला समेत रहेका छन् ।

गाजामा सहयोग गरिरहेको अमेरिकाको परियोजना ‘प्रोजेक्ट होप’ ले यो आक्रमण अन्तर्राष्ट्रिय कानूनको बर्खिलाप रहेको जनाएको छ । इजरायली सेनाले हमासको सैन्य शक्तिमा लक्षित आक्रमण भए पनि सर्वसाधारणको ज्यान गएकोमा दुःख व्यक्त गरेको छ ।

हमास र इजरायल युद्ध विरामका लागि वार्ता गरिरहेको भए पनि बिहीबार ६६ जना प्यालेस्टाइनीको इजरायली आक्रमणमा ज्यान गएको छ । अस्पतालको अगाडि कुपोषण, सङ्क्रमण, क्रोनिक रोग तथा अन्य धेरै रोगले प्रभावित लाइन लागेर बसेको समयमा सो आक्रमण भएको हो ।