काठमाडौँ । सुनसरीको देवानगञ्ज गाउँपालिका-३ कप्तानगञ्जमा भएको घटनापछि उत्पन्न परिस्थितिबारे जिल्ला प्रशासन कार्यालय सुनसरीमा सर्वपक्षीय बैठक जारी रहेको छ।

सहायक प्रमुख जिल्ला अधिकारी पोषण लामिछानेका अनुसार जिल्ला प्रशासन कार्यालयमा भइरहेको छलफलमा जनप्रतिनिधि, विभिन्न राजनीतिक दलका प्रतिनिधि, सुरक्षा निकायका अधिकारी तथा धार्मिक अगुवाहरू सहभागी छन्। बैठकमा घटनापछिको सुरक्षा अवस्था, शान्ति-सुव्यवस्था कायम गर्ने उपाय तथा आवश्यक समन्वयका विषयमा छलफल भइरहेको जनाइएको छ।

कप्तानगञ्जमा आइतबार राति दुई समूहबीच भएको झडप नियन्त्रण गर्ने क्रममा प्रहरीले चलाएको गोली लागेर एक जनाको मृत्यु भएको थियो।

उक्त घटनामा नौ जना प्रदर्शनकारी र १३ जना प्रहरी घाइते भएको प्रशासनले जनाएको छ। घटनापछि उत्पन्न अवस्थालाई सामान्य बनाउन स्थानीय प्रशासनले विभिन्न सरोकारवालासँग समन्वय र संवादलाई निरन्तरता दिएको छ।