कोलम्बो । १७ वर्षमुनिको साफ च्याम्पियनसिप फुटबलको उपाधिका लागि नेपालले आज भारतसँग खेल्दैछ । श्रीलङकाको राजधानी कोलम्बोको रेस कोर्स ग्राउण्डमा हुने खेल नेपाली समय अनुसार राति सवा ८ बजे सुरू हुनेछ ।

प्रतियोगिताको पहिलो सेमिफाइनलमा भारतले बङ्गलादेशलाई २-१ ले हराएको थियो । दोस्रो सेमिफाइनलमा नेपालले आयोजक श्रीलङ्कालाई ६-० ले हराएर भारतसँगको भेट पक्का गरेको हो । प्रतियोगितामा नेपाल अपराजित रहदै फाइनल पुगेको हो । भारतले भने समूह चरणमा एउटा खेल हारेको थियो । नेपालले समूह चरणमा भारतलाई ३-१ गोल अन्तरले हराएको थियो ।