झिसमिसेको
भालेको डाक हुँ म

भुँईमा उज्यालो नखस्दै
घरभित्रको कसिंगारको दुश्मन-कुचो हुँ म

बिहानीपखको
एक कप मीठो चिया हुँ म

सुर्योदयसँगै
पोषणयुक्त खाजा हुँ म

अफिस/स्कुल समयको
भित्ते घडीको टिकटिक आवाज हुँ म

मधुमेह रोगी
बाबाको दबाई हुँ म

प्यारलाइसिसग्रस्त
आमाको लौरो हुँ म

जवानीमा प्रवेश गर्दै गरेको नन्दको
आत्मीय साथी हुँ म

घरभित्र
सबैको ममतामयी आमा हुँ म

छरछिमेक, नातागोताको आँखा मा
असल र कुशल बुहारी हुँ म

घरको ढिकुटीको
सह हुँ म

घरको ढोकाको
चाबी हुँ म

घरको
इज्जत हुँ म

करेसाबारीको
शोभा हुँ म

आगानको
सिमाना हुँ म

परिवारको
मुटु हुँ म

तर
सबै सबै भएर पनि
मेरो लागि चाहिँ
के हुँ म ?