दसैँअघि मन्त्रिपरिषद् विस्तार असम्भव !

दसैँअघि मन्त्रिपरिषद् विस्तार असम्भव !



काठमाडौँ । सत्ता गठबन्धन आवद्ध दलहरूबीच मन्त्रालय भागबन्डाका विषयमा कुरा नमिल्दा मन्त्रिपरिषद् विस्तार प्रक्रिया लम्बिएको छ । बुधबार बसेको गठबन्धन दलका नेताहरूको बैठकमा दलहरूबीच मन्त्रालय भागबन्डा टुंगिएको बताइए पनि नेकपा (एकीकृत समाजवादी) र जनता समाजवादी पार्टी (जसपा) को असन्तुष्टिका कारण मन्त्रिपरिषद् विस्तारको मिति अन्योलमा छ ।

प्रधानमन्त्री शेरबहादुर देउवा र माओवादी केन्द्रका अध्यक्ष पुष्पकमल दाहाल ‘प्रचण्ड’ले बिहीबार मन्त्रिपरिषद् विस्तार गरिने बताएका थिए । तर, एकीकृत समाजवादीले मन्त्रालय चित्तबुझ्दो नपाएको भन्दै बिहीबार बिहान बसेको स्थायी कमिटी बैठकबाट मन्त्रालयमा कुरा मिलेपछि मात्र मन्त्रीको नाम दिने निर्णय गरेको थियो ।

सो निर्णयलगत्तै गठबन्धन दलका शीर्ष नेताबीच बालुवाटारमा जारी बैठकबाट नेकपा (एस) अध्यक्ष माधवकुमार नेपाल बाहिरिएका छन् । उनले मन्त्रालय भागबण्डामा पुनर्विचार भएमात्र मन्त्रीको नाम दिने बताएर बैठकस्थल छाडेको नेकपा (एस) का एक नेताले बताए ।

ती नेताका अनुसार देउवाले आफ्नो पार्टीको भागमा परेको मन्त्रालयमा पुनर्विचार नगरे अब दसैँअघि मन्त्रिपरिषद् विस्तार असम्भव छ ।

नेपाल बैठकस्थलवाट बाहिरिए पनि अन्य नेता भने छलफलमै छन् । जसपाले पनि आन्तरिक सहमति मजबुद भइनसकेको भन्दै देउवालाई मन्त्रीको लिष्ट उपलब्ध गराइसकेको छैन ।

मतदान गर्न

बाँकी