विश्व नेपाली साहित्य महोत्सव धनगढीमा फागुन १९-२१ गते हुने

विश्व नेपाली साहित्य महोत्सव धनगढीमा फागुन १९-२१ गते हुने



काठमाडौं । विश्व नेपाली साहित्य महोत्सव धनगढीमा फागुन १९, २० र २१ गते सञ्चालन हुने भएको छ । सुदूरपश्चिमाञ्चल साहित्य समाजको आयोजनामा महोत्सव हुन लागेको हो । समाजले प्रत्येक वर्ष धनगढीमा महोत्सवको आयोजना गर्दै आएको छ । यो महोत्सवको दोस्रो संस्करण हो । ७१औं प्रजातन्त्र दिवसको अवसरमा सुदूरपश्चिम प्रदेश प्रमुख देवराज जोशीको प्रमुख आतिथ्यतामा समाजमा आयोजित कार्यक्रमकाबीच महोत्सव आयोजना गरिने आयोजकले जानकारी दिएको हो ।

‘काली–कर्णाली क्षेत्रको गौरव गाथालाई आत्मसात् गर्दै भाषा, साहित्य, कला र संस्कृतिको विकासका लागि हामीले प्रत्येक वर्ष महोत्सवको आयोजना गर्दै आएका छौं,’ समाजका अध्यक्ष रामलाल जोशीले भने, ‘गत वर्ष विश्वभरीका नेपाली भाषी साहित्यकारको सहभागितामा राष्ट्रपतिले महोत्सवको उद्घाटन गर्नुभएको थियो । हामीले यस वर्ष पनि सोही कार्यक्रमलाई निरन्तरता दिन खोजेका हौं । यस कार्यक्रमले सुदूरपश्चिम प्रदेशको कला, संस्कृति, प्रकृति, पर्यटन, इतिहास, सम्पदा, दर्शन, उद्योग व्यापार र समग्र सामाजिक विकासमा टेवा पुग्ने उनले बताए ।

देशका कवि, लेखक, साहित्यकार, पत्रकार, कलाकार र बुद्धिजीवीलाई कार्यक्रममा आमन्त्रण गरिएको जोशीले बताएका छन् । यसका साथै देश बाहिर रहेका नेपाली भासी साहित्यकारहरूलाई पनि कार्यक्रममा आमन्त्रित गरिएको उनले बताए ।

यस्तै कार्यक्रम संयोजक लोक देउडा गायक यज्ञराज उपाध्यायले नेपाली भाषा, साहित्यको विकास गर्नु नै कार्यक्रमको मुख्य उद्देश्य रहेको बताएका छन् । उनले सधैँ केन्द्रकै मुख ताक्नुभन्दा आफ्नो कला, संस्कृतिको विकासका लागि स्वयं आफै जाग्नुपर्ने बताएका छन् ।

‘हामी जाग्यौ भने राज्य सहयोग गर्न बाध्य हुन्छ । त्यसैले हाम्रो कला, संस्कृतिको विकासका लागि हामी आफै जाग्नुपर्छ,’ उपाध्यायले भने । उनले आगामी कार्यक्रमहरूमा जस्तै यस वर्ष पनि सबैको साथ-सहयोग पाउने विश्वास व्यक्त गरेका छन् ।

मतदान गर्न

बाँकी