काठमाडौं । मेयरको टिकट बोकेर काठमाडौंबाट हेलिकोप्टर चढी उम्मेदवारी दर्ता गराउन दिक्तेल पुगेका धर्मराज पोखरेलले स्थानीयको राम धुलाइ खाएर फर्किनु प-यो । काठमाडौंमा व्यवसाय गरेर जिल्लामा चुनाव लड्न जाँदाको परिणाम के हुन्छ भन्ने कुरा धर्मराज स्थानीय निर्वाचन २०७९ को गतिलो उदाहरण बनेका छन् ।

झन्डै एक दर्जन संघसंस्थाको नेतृत्व गरेर विजय इन्जिनियरिङ कन्सल्टेन्सी सञ्चालन गरेका धर्मराजले काठमाडौं उपत्यकाभित्र हजारौं घरको नक्सा कोरेका छन् । पेशाले इञ्जिनियर धर्मराज लोक गायन क्षेत्रमा पनि चर्चित छन् ।

राष्ट्रिय प्रजातन्त्र पार्टीबाट केही समय अघि नेपाली कांग्रेसमा प्रवेश गरेका धर्मराजको मेयर पदको टिकट खोसिएपछि राजनीतिक छलाङमा धक्का पुगेको छ । केन्द्र र प्रदेशलाई रिझाएर टिकट लिन सकिन्छ, तर स्थानीय कार्यकर्ताको चित्त बुझाउनुपर्छ भन्ने धर्मराजले हेक्का राखेनन् । यो गम्भीर भुलेकै कारण उनले मतदाताबाट विरोधको सामना मात्रै गरेनन, मेयर पदको टिकटसमेत गुमाए ।

जिल्लामा कार्यकर्ताको व्यापक विरोधपछि नेपाली कांग्रेस केन्द्रीय कार्यालयबाटै तीर्थराज भट्टराईलाई टिकट दिएसँगै मेयर बनेर दिक्तेल रुपाकोट मजुवागढी नगरपालिकाको नक्सा कोर्ने धर्मराजको सपना तुइएको छ ।