काठमाडौं । नेपाली काँग्रेसको केन्द्रीय समिति बैठक सोमबार दिउँसो १ बजे पार्टी केन्द्रीय कार्यालय सानेपामा बस्ने भएको छ।वैशाख ३० मा भएको स्थानीय तह चुनावको समीक्षामा काँग्रेस बैठक केन्द्रित हुनेछ। चुनाव भएको करिब दुई महिना हुन लाग्दा काँग्रेसले बल्ल केन्द्रीय समितिमा चुनावी समीक्षा गर्न लागेको हो।

यसअघि उपसभापति पूर्णबहादुर खड्का नेतृत्वमा रहेको निर्वाचनसम्बन्धी समिति र उक्त समितिअन्तर्गत केन्द्रीय सदस्य प्रदीप पौडेल नेतृत्वमा रहेको उपसमितिले स्थानीय तह चुनावको समीक्षा गरेको थियो।

काँग्रेसले ७५३ पालिकामध्ये ३२९ पालिका प्रमुख जितेको थियो। गठबन्धन गरेका र एक्लै जितेका ठाउँ र मतबारे विश्लेषणसहित प्रतिवेदन पनि काँग्रेसले तयार पारेको छ।

चुनावी समीक्षाबाहेक केन्द्रीय समिति बैठकमा कोषाध्यक्ष चयन गरिनुपर्ने, संसदीय समिति, कार्यसम्पादन समितिलाई पूर्णता दिनुपर्ने र विभागहरू तथा समितिहरू गठन गरिनुपर्ने एजेन्डा पनि प्रवेश हुने एक केन्द्रीय सदस्यले बताए।

सभापति शेरबहादुर देउवाले छ महिनाभित्र गरिसक्नुपर्ने मनोनीत काम अहिलेसम्म गरेका छैनन्। २० जना केन्द्रीय सदस्य मनोनीत गर्न बाँकी छ।

साथै भ्रातृ तथा शुभेच्छुक संघसंस्थाका महाधिवेशन सुनिश्चित गर्नुपर्ने, नेविसंघलगायत भ्रातृ संस्थालाई पूर्णता दिनुपर्ने माग पनि उठेको छ। काँग्रेसले केही नयाँ भातृ तथा शुभेच्छुक संघसंस्थालाई मान्यता दिन लागेको छ। यसबारे पनि केन्द्रीय समितिमा छलफल गरी निर्णय लिने काँग्रेसले जनाएको छ।

सभापति देउवाले विभाग तथा भ्रातृ संघसंस्थाबारे आवश्यक निर्णय लिइने बताइरहेका छन्। नेता शेखर कोइराला पक्षले सरकारका कामकारबाहीबारे पनि समीक्षा हुनुपर्ने बताएको छ। आइतबार कोइरालाको सचिवालयमा भएको पदाधिकारी तथा केन्द्रीय सदस्य भेलाले सरकारका कामकारबाहीबारे गम्भीर समीक्षा हुनुपर्ने र सभापतिले विधि र विधान अनुसार काम गर्नुपर्ने निष्कर्ष निकालेको थियो।

केन्द्रीय समितिमा हुने अर्को छलफलको विषय आगामी संसदीय र प्रदेश सभा सदस्य निर्वाचनबारे हो। सम्भवतः मंसिरमा हुने उक्त निर्वाचनका लागि गठबन्धनलाई सँगै लैजाने कि नलैजाने भन्ने विषयमा केन्द्रीय सदस्यहरूबाट धारणा लिने तयारीमा काँग्रेस छ।

प्रधानमन्त्रीसमेत रहेका सभापति देउवा गठबन्धनलाई चुनावसम्मै लैजाने पक्षमा छन्। एक्लै गएर बहुमत नआउने भएकोले अरू दलसँग जानुपर्ने बाध्यता रहेको देउवाले बताए । यीलगायत समसामयिक राजनीतिक घटनाक्रमबारे पनि आज छलफल हुनेछ।

साथै कोइराला पक्षका विद्यार्थीहरूले आज सानेपास्थित पार्टी कार्यालय घेराउ गर्ने तयारी गरेका छन्। भ्रातृ संस्थालाई पूर्णता दिनुपर्ने माग उनीहरूको छ। सभापति देउवाले नेविसंघ र तरुण दलमा अध्यक्ष मात्रै तोकेका छन्। अध्यक्ष तोक्दा कोइरालासँग परामर्श नगरिएको भन्दै विरोध पनि भइरहेको छ।

मुख्यसचिव कृष्णप्रसाद पौडेलका अनुसार बैठक स्थानीय चुनावी समीक्षामा केन्द्रित रहनेछ भने पार्टीका केही आन्तरिक विषयमा पनि छलफल गर्ने तयारी छ। बैठकमा भ्रातृ तथा शुभेच्छुक संघसंस्थाका विधान पारित गर्नेबारे पनि छलफल हुनेछ।

कोइराला पक्षले प्रदर्शन गर्दै

नेपाली काँग्रेसका नेता डा.शेखर कोइराला पक्षका नेता-कार्यकर्ताहरूले भ्रातृ संस्थाका कार्यसमितिलाई पूर्णता दिन माग गर्दै पार्टी केन्द्रीय कार्यालयमा प्रदर्शन गर्ने भएका छन् ।

पार्टीको केन्द्रीय समिति बैठक सुरु हुनुअघि नेपाल विद्यार्थी सङ्घ, तरुण दल, महिला सङ्घ लगायतका भ्रातृ संस्थाका कोइराला पक्षका नेता–कार्यकर्ताहरूले प्रदर्शन गर्न लागेका हुन् ।

काँग्रेस केन्द्रीय समितिको बैठक सोमबार दिउँसो १ बजे केन्द्रीय कार्यालय सानेपामा बस्ने गरी बोलाइएको छ । त्यसअघि साढे ११ बजेदेखि नै पार्टी कार्यालय बाहिर प्रदर्शनको कार्यक्रम तय गरिएको छ ।

अवधि समाप्त भएपछि केन्द्रीय कार्यसमिति भङ्ग गरिएका भ्रातृ संस्था वैधानिक विधिबाट पूर्णताको माग गर्दै प्रदर्शन गर्न लागिएको शेखर कोइराला निकट विद्यार्थी संघकी नेता प्रेमिका रानामगरले जानकारी दिइन् ।

१० फागुनमा बसेको काँग्रेस केन्द्रीय समितिको बैठकले अवधि पूरा भएका १० भ्रातृ संस्थाको केन्द्रीय कार्यसमिति भङ्ग गरेको थियो । नेविसंघ, तरुण दल, प्रजातन्त्र सेनानी सङ्घ, किसान सङ्घ, आदिवासी जनजाति सङ्घ, लोकतान्त्रिक अपाङ्ग सङ्घ, तामाङ सङ्घ, ठाकुर समाज, महिला सङ्घ र भूतपूर्व सैनिक सङ्घको केन्द्रीय कार्य समिति फागुन ३ मा भङ्ग गरिएको थियो ।

सभापति शेरबहादुर देउवाले चारवटा भ्रातृ संस्थाको मूल नेतृत्व मात्रै मनोनीत गरेका छन् ।

सभापति देउवाले नेविसंघको अध्यक्षमा दुजाङ शेर्पा, तरुण दलमा विद्वान गुरुङ, किसान सङ्घमा गणेश तिमिल्सिना र आदिवासी जनजाति सङ्घमा ओमबहादुर थापालाई मनोनीत गरेका छन् । अरू ६ वटा भ्रातृ संस्थाको मूल नेतृत्व खाली छ ।