नेविसंघ अध्यक्ष दुजाङ शेर्पालाई बर्खास्त गर्न कांग्रेस दोलखाको माग

नेविसंघ अध्यक्ष दुजाङ शेर्पालाई बर्खास्त गर्न कांग्रेस दोलखाको माग


ग्लोब नेपाल
1.6k
Shares

काठमाडौँ । नेपाली कांग्रेस जिल्ला कार्य समितिले दोलखाले नेपाल विद्यार्थी सङ्घ (नेविसंघ)का केन्द्रीय अध्यक्ष दुजाङ शेर्पालाई बर्खास्त गर्न माग गरेको छ । सोमबार पार्टी सभापति शेरबहादुर देउवालाई पत्र पठाउँदै दोलखाका पार्टी सभापति बर्मा लामाले नेविसंघ अध्यक्ष शेर्पालाई बर्खास्त गर्न माग गरेका हुन् ।

पार्टीको सर्वसम्मत सिफारिसलाई बेवास्ता गरी शेर्पाले दोलखामा साधारण सदस्य नै नभएको व्यक्तिलाई नेविसंघको जिल्ला अध्यक्ष मनोनीत गरेको भन्दै बर्खास्त गर्न माग गरिएको हो ।

‘पार्टीको जिल्ला तहले गरेको सर्वसम्मत निर्णय र सिफारिस लत्त्याइ व्यक्तिगत स्वार्थ र काठमाडौँतिरको निकटताको आधारमा जिल्ला अध्यक्ष तोक्ने र प्रत्येक जिल्लामा विवाद सिर्जना गर्ने नेविसंघका असक्षम केन्द्रीय अध्यक्ष दुजाङ शेर्पालाई तत्काल बर्खास्त गर्न माग गर्दछौँ,’ बर्माले पठाएको पत्रमा उल्लेख छ।

नेविसंघ केन्द्रीय समितिले जिल्ला अध्यक्षको नाम सिफारिस गर्न पत्र पठाएपछि दोलखा कांग्रेसले सर्वसम्मत रूपमा सौगात थापाको नाम सिफारिस भएको थियो ।तर, दुजाङले अर्कै व्यक्तिलाई अध्यक्ष तोकेर पठाएको आरोप छ ।