क्यानडाको जंगलमा लागेको व्यापक डढेलोका कारण उत्तर अमेरिकाका दशौं लाख मानिस वायु प्रदुषणको उच्च जोखिममा परेका छन् । वायुको गुणस्तर अत्यन्त खराब भएकाले उत्तर अमेरिकीहरुलाई घर बाहिर निस्कँदा N95 मास्क लगाउन सुझाव दिइएको छ ।

डढेलोका धुँवाका कारण अमेरिकाको न्युयोर्क शहर र क्यानडाको ओटावाको वायुको गुणस्तर अत्यन्त खराब मापन गरिएको छ । जनस्वास्थ्यविद्हरुले खतरनाक वायुको स्तर रहेको भन्दै सर्वसाधारणलाई सचेत गराएका छन् ।

सार्वजनिक स्वास्थ्य अधिकारीहरूले मानिसहरूलाई घर बाहिर व्यायाम नगर्न र सकेसम्म धुवाँको जोखिमलाई कम गर्न चेतावनी दिएका छन् । डढेलोका कारण क्यानडाभरि हजारौं मानिसहरू विस्थापित भएका छन् ।

वन डढेलोका कारण क्यानडामा हालै मात्रै २० हजार मानिसले विस्थापित भएको जनाइएको छ । आगलागीले ३० लाख ३० हजार हेक्टरभन्दा बढी जंगल जलेको छ । क्यानाडाका अधिकारीहरूले देशले सबैभन्दा खराब वन डढेलोको सामना गरेको बताएका छन् । यसले जलवायु परिवर्तनको असर सुख्खा मौसमको जोखिम अझै बढाएको बताएका छन् ।