काठमाडौँ । सम्पर्कविहीन भएका डोल्पा सदरमुकाम दुनैस्थित नेपाली सेनाको नन्द बक्स गुल्मका गुल्मपति विमल पण्डित अझै भेटिएका छैनन् । उनी आइतबार सम्पर्कविहीन भएका थिए ।

मंगलबार बिहानसम्म उनी नभेटिएको नेपाली सेनाका प्रवक्ता कृष्णप्रसाद भण्डारीले जानकारी दिए । उनका अनुसार दुनैबाट पण्डितले त्रिपुराकोटका लागि गाडी रिजर्भ गरेको खुलेको छ । त्यसपछि भने उको मोबाइल सम्पर्क टुटेको उनले बताए । पण्डितको खोजी कार्य भने जारी छ ।

सेनानी पण्डित आइतबार अपराह्न इभिइनिङ वाकमा जाने भन्दै ब्यारेकबाट निस्किएका थिए । उनले आफ्ना सुरक्षा गार्डलाई आफूसँग बीचबाटै फर्काईदिएका थिए । त्यसपछि उनले त्रिपुराकोटसम्मका लागि गाडी रिजर्भ गरेका थिए ।