बुटवल । तम्घासबाट बुटवल जाँदै गरेको लु १ ज ४६०० न स्कर्पियो गाडी जोर्तेमा पहिरोमा पुरिएको छ । घटनामा मृत्यु भएकाको सनाखत खुलेको जिल्ला प्रहरी कार्यालय पाल्पाले जनाएको छ ।

पाल्पाका डिएसपी वीरेन्द्र थापाका अनुसार मृत्यु हुनेमा जिल्ला प्रहरी कार्यालय गुल्मीमा कार्यरत प्रहरी सहायक हवलदार यम बहादुर बोहरा, गुल्मी जिल्लाको रेसुङ्गा नगरपालिका ७ भुजेलखर्क बस्ने वर्ष ५० की मनकला चुदारा र पोखरा महानगरपालिका–२५ का विनोद तिमिल्सिना रहेका छन् । विनोद पेसाले शिक्षक रहेको खुलेको छ ।

घटनामा रेसुङ्गा नगरपालिका–८ खानीगाउँ ठाउँमा बस्ने वर्ष ४० की शोभा घर्ती मगर, वर्ष ३७ की सुस्मा राना र उनकी छोरी वर्ष ६ की सुरबी राना घाइते भएका छन् । यस्तै खानीगाउँ बस्ने वर्ष ४५ का टेक बहादुर जिएम, वर्ष २७ की स्विकृती थापा, उनका छोरा ५ वर्षका सुरेन थापा पनि घाइते भएका छन्। यस्तै एक ५ महिनाको बच्चा सो दुर्घटनामा परे पनि बाहिर चोट नदेखिएको प्रहरीले जनाएको छ ।

उनीहरूको मेडिकल कलेज पाल्पामा उपचार भइरहेको छ । यस्तै चालक सोही ठाउँका ३६ वर्षका बालकृष्ण श्रेष्ठ सामान्य घाइते भएका छन् उनलाई प्रहरीले नियन्त्रणमा लिएर थप अनुसन्धान सुरु गरेको जनाएको छ ।