अमेरिकामा पहिलो पटक नाइट्रोजन ग्यास प्रयोग गरी दोषीलाई मृत्युदण्ड दिइने भएको छ । ५८ वर्षीय केनेथ युजिन स्मिथ सन् १९८८ मा भएको हत्या अभियोगमा दोषी ठहर भएका थिए ।

उनलाई अलाबामामा यही जनवरी २५ मा नाइट्रोजन हाइपोक्सियाले मृत्युदण्ड दिइने भएको छ । दोषीलाई नाइट्रोजन सिलिन्डरसँग जोडिएको मास्क लगाएर अक्सिजन लिनबाट वञ्चित गरिनेछ ।

यसअघि नोभेम्बर २०२२ मा स्मिथलाई घातक विषादीको सुई दिएर मृत्युदण्ड दिने प्रयास गरिएको थियो । तर उनको नशामा सुइ घुसाउने प्रयास असफल भएपछि सजाय रोकिएको थियो ।

मृत्युदण्डको यो विधिलाई क्रूर, अमानवीय भन्दै रोक्नु पर्ने आवाज पनि उठेको छ । नाइट्रोजन-ग्यास मृत्युदण्ड रोक्न स्मिथका वकिलले गरेको पुनरावेदनलाई अदालतले अस्वीकार गरेपछि उनलाई पर्सि मृत्यु दण्ड दिन लागिएको हो ।