विराटनगर । विराटनगर महानगरपालिकाले आर्थिक वर्ष २०८१-८२ का लागि रु ३ अर्ब ४९ करोड ९८ लाख ८६ हजार रुपैयाँ बराबरको बजेट ल्याएको छ । सोमबार उपमेयर शिल्पा निराला कार्कीले नगर सभामा उक्त बजेट पेस गरेकी हुन् ।

आर्थिक वर्ष २०८०-०८१ का लागि महानगरपालिकाले ३ अर्ब ३६ करोड १७ लाख २५ हजार ६ सय २६ रुपैयाँ बराबरको बजेट ल्याएको थियो । अहिले महानगरपालिकाले बजेट बढाएर ल्याएको हो ।

जसअनुसार महानगरले कार्यालय सञ्चालन तथा प्रशासनिक खर्चका लागि रु ५९ करोड बजेट विनियोजन गरिएको छ । यस्तै ऋणको सावा ब्याज भुक्तानीमा रु ५ करोड, चालु आवको चालु खर्च तर्फको दायित्व भुक्तानीमा ३ करोड ३४ लाख ८३ हजार, समपूरक कार्यक्रममा रु ६ करोड १० लाख, वडास्तरीय योजनातर्फ रु ४३ करोड ३ लाख १२ हजार बजेट विनियोजन गरिएको कार्कीले जानकारी दिइन् ।

यस्तै बहुवर्षीय ठेक्का तथा गौरवका आयोजना एवं दायित्व सरिआएका योजनाहरूको भुक्तानीका लागि रु ५० करोड, बस्ती विकास र तराइ मधेस समृद्धि कार्यक्रम तर्फ रु ५ करोड ६० लाख, मर्मत सम्भार तर्फका लागि रु १० करोड तथा भारी सवारी साधन खरिदका लागि रु २ करोड बजेट विनियोजन गरेको कार्कीले जानकारी दिइन् ।

यस्तै सामाजिक विकास क्षेत्र अन्तर्गत शैक्षिक विकास कार्यक्रम तर्फ रु ७८ करोड ७८ लाख १ हजार, स्वास्थ्य विकास कार्यक्रम तर्फ रु २० करोड ५७ लाख ९३ हजार, महिला लक्षित कार्यक्रम तर्फ रु ९९ लाख ५७ हजार, संघ संस्थातर्फ २ करोड ७० लाख बजेट विनियोजन भएको छ ।

यस्तै ज्येष्ठ नागरिकतर्फ रु ९ लाख ९५ हजार, अपाङ्गता क्षमता विकास कार्यक्रमतर्फ रु २८ लाख ८ हजार विनियोजन गरिएको छ । यसैगरी आर्थिक विकास क्षेत्र अन्तर्गत कृषि विकास तर्फ रु १ करोड ३ लाख, पशुपंक्षी तथा भेटनरी तर्फ रु १ करोड ५३ लाख ९७ हजार, सहकारी तर्फ रु २४ लाख, उद्यमशील विकास तर्फ रु ५० लाख, उपभोक्ता हित संरक्षणका लागि रु ८ लाख ५० हजार, पर्यटन प्रवर्द्धनका लागि रु १ करोड ९४ लाख विनियोजन गरिएको छ ।

यस्तै आदिवासी जनजाति, दलित, मधेशी, तथा यौनिक तथा अल्पसङ्ख्यकतर्फ रु ६२ लाख ८६ हजार, बालबालिका लक्षित कार्यक्रमतर्फ रु ७० लाख ८० हजार, युवा विकास कार्यक्रम तर्फ रु ९५ लाख ८४ हजार, खेलकुद विकास कार्यक्रमका लागि रु १ करोड ८ लाख, रोजगार प्रवर्द्धन कार्यक्रमतर्फ रु ७० लाख ४६ हजार बजेट विनियोजन भएको छ ।