तनहुँ । तनहुँमा बाढीले बगाएर ल्याएको दाउरा निकाल्ने क्रममा एक जना बेपत्ता भएका छन् । जिल्ला प्रहरी कार्यालय तनहुँकाअनुसार व्यास नगरपालिका–१ भादगाउँका ५५ वर्षका तालबहादुर थापा छाब्दीखोला दोभानमा बाढीले बगाएर ल्याएको दाउरा तान्दै गर्दा नदीमा बेपत्ता भएका हुन् । कार्यालयका प्रहरी नायब उपरीक्षक दीपककुमार रायले थापाको खोजी भइरहेको बताए ।

बाढीले बगाएर ल्याएको दाउरा निकाल्न नदी किनारमा भीड लाग्ने गर्छ । प्रहरीले बाढीका बेला मानिस नै बग्ने र ज्यानैसमेत जाने जोखिम हुने भएकाले बाढी आएका बेला दाउरा निकाल्ने, माछा छोप्नेजस्ता काम नगर्न अनुरोध गरेको छ ।