काठमाडौं । ५२ वर्षको उमेरमा कक्षा १२ को परीक्षा दिएका वडाअध्यक्ष शिवप्रसाद खनाल उत्तीर्ण भएका छन् । उनी मकवानपुर मनहरी गाउँपालिका वडा नम्बर १ का वडाअध्यक्ष हुन् । आफ्नो नाति नातिनीको उमेरका बालबालिकासँगै पठनपाठन गर्दै उनी कक्षा १२ को परीक्षामा सहभागी भएका थिए ।

निर्मल बहुमुखी क्याम्पस बस्तीपुर परीक्षा केन्द्रबाट परीक्षामा सहभागी भएका उनी राजनीतिक तथा सामाजिक काम गर्दा शिक्षाको अति नै महत्त्वपूर्ण भूमिका हुने भएकाले पढाइलाई निरन्तरता दिएको बताउछन् । पढाइ र ज्ञान आर्जनका लागि कुनै उमेर नहुने मान्यता राखेका खनाल शिक्षा र सामाजिक क्षेत्रमा जीवन रहेसम्म सक्रिय हुने धारणा राख्छन् ।