काठमाडौं । श्रीलंकासँगको तीन खेलको टी–२० अन्तर्राष्ट्रिय क्रिकेट शृंखला न्युजिल्यान्डले एक खेलअघि नै जितेको छ । आज भएको दोस्रो खेलमा न्युजिल्यान्डले श्रीलंकालाई ४५ रनले हरायो ।

न्युजिल्यान्डले दिएको १ सय ८७ रनको लक्ष्य पछ्याएको श्रीलंका १९ ओभर १ बलमा १ सय ४१ रनमा अलआउट भयो । श्रीलंकाका कुशल पेरेराले ४८, पथुम निसान्काले ३७ रन बनाए । श्रीलंकाले १४ रन जोड्दा ७ विकेट गुमायो । न्युजिल्यान्डका ज्याकब डुफेले ४ विकेट लिए ।

यसअघि बे ओभल मैदानमा टस हारेर ब्याटिङको निम्तो पाएको घरेलु टोली न्युजिल्यान्डले २० ओभरमा ५ विकेट गुमाएर १ सय ८६ रन बनायो । न्युजिल्यान्डका मार्क चापम्यानले ४२ तथा टिम रोबिनसन र मिचेल हेले समान ४१ रन बनाए । श्रीलंकाका वानिन्दु हसरङ्गाले २ विकेट लिए ।

न्युजिल्यान्डले पहिलो खेल ८ रनले जितेको थियो । टी–२० शृंखलाको तेस्रो तथा अन्तिम खेल आउँदो बिहीवार हुनेछ । यसपछि न्युजिल्यान्ड र श्रीलंकाबीच तीन खेलको एकदिवसीय अन्तर्राष्ट्रिय क्रिकेट शृंखला शुरू हुनेछ ।