काठमाडौँ । नेपालले आइसीसी एकदिवसीय विश्वकप लिग २ अन्तर्गतको सिरिजमा विजयी शुरुवात गरेको छ । गएराती सम्पन्न खेलमा स्कटल्याण्डलाई एक विकेटले पराजित गर्दै नेपालले विजयी शुरुवात गरेको हो  ।  

स्कटल्याण्डले नेपाल लाई दिएको २९७ रनको लक्ष्य पछाएको नेपालले ४९.५ ओभरमा ९ विकेट गुमाउदै लक्ष्य पुरा गरेको थियो । नेपालको जितमा करण केसीले शानदार ब्याटिंग गरेका थिए ।

करणले अविजित ६५ रन बनाउदै नेपाललाई जित दिलाएका थिए । त्यस्तै कुशल भुर्तेलले ५३ , गुलशन झाले ४२, भिम सार्कीले ४०, कप्तान रोहित पौडेलले ३७, आसिफ सेखले २० रन बनाएका थिए । यसअघि टस हारेर पहिला ब्याटिंग गरेको स्कटल्याण्डले ५० ओभरमा ७ विकेट गुमाउदै २९६ रन बनाएको थियो ।

स्कटल्याण्डका लागि चार्ली टीरले सर्बाधिक ८० रन बनाए भने फिनाली म्याकरीथले ५५ रन बनाएका थिए । त्यस्तै कप्तान रिची बेरिंगटनले ४० र म्याथ्यु क्रसले ३९ रन बनाएका थिए ।त्यसैगरी नेपाली बलर रिजन ढकाल, करण केसी र सोमपाल कामीले २-२ विकेट लिएका थिए भने सन्दीप लामिछानेले एक विकेट लिए ।

यो जितपछि नेपालको लिग-२ मा १३ खेलमा ८ अंक भएको छ र नेपाल एक स्थान माथि उक्लिदै सातौं स्थानमा पुगेको छ । त्यसैगरी स्कटल्याण्डको १७ खेलमा२० अंक रहेको छ र हाल चौथो स्थानमा रहेको छ ।अब यस सिरिज अन्तर्गत नेपालले अर्को खेल भोली नेदरल्याण्डससँग खेल्ने छ ।