काठमाडौं । नेपाली कांग्रेसका महामन्त्री गगनकुमार थापाले काम नलाग्ने दर्जनौँ कानुन खारेज गर्न आवश्यक रहेको बताएका छन् ।

काँग्रेसको केन्द्रीय आपूर्ति तथा उपभोक्ता विभागले मंगलबार काठमाडौँमा आयोजना गरेको ‘आर्थिक वर्ष २०८२/८३ को बजेटले उपभोक्ता बजार आपूर्ति श्रृङ्खलामा पार्ने प्रभाव’ विषयक अन्तर्क्रिया कार्यक्रममा बोल्दै उनले यस्तो बताएका हुन् ।

उनले कांग्रेस र एमालेसँगै भएको बेलामा रोकिएर बसेका ९० को दशकमा गरिएका आर्थिक सुधारका काम कामहरूलाई अगाडि बढाउनुपर्ने बताए । उनले आर्थिक सुधारका कामका विषयमा केही दिनअघि मात्रै प्रधानमन्त्री केपी शर्मा ओली र कांग्रेस सभापति शेरबहादुर देउवासँग छलफल गरेको समेत जानकारी दिए ।

महामन्त्री थापाले कानुनमा सुधार गर्ने कुरा अगाडि बढाएको बताउँदै दोस्रो चरणको काम केही दिनमा सुरु गर्ने जिकिर गरे । उनले काम नलाग्ने दर्जनौँ नियम र कार्यविधिलाई खारेज गरी नयाँ कुरा थपेर संरचनालाई ठिक ठाउँमा लानुपर्नेमा जोड दिए ।

उनले भने, “नेपाली कांग्रेस र नेकपा (एमाले)सँगै भएको बेलामा ९० को दशकमा गरिएका आर्थिक सुधार, जुन पछिल्लो समय रोकिएर गएको छ । ती सुधारका सन्दर्भमा हामीले व्यापक रूपमा काम गर्नुपर्ने छ । अस्ति मात्रै सम्माननीय प्रधानमन्त्री र सभापतिसँग बसेर छलफल गरेका छौँ । हामीले कानुनमा सुधार गर्ने कुरा अगाडि बढायौँ, अब हामी दोस्रो चरणको काम केही दिनमा सुरु गर्छौ । हामीले काम नलाग्ने दर्जनौँ कानुनहरू खारेज गर्न चाहन्छौँ । नियम, कार्यविधिका नाममा जुन शासन चलाइएको छ, हामीले दर्जनौँ खारेज गर्नुपर्नेछ । कैयौँ नयाँ कुराहरू बनाउनुपर्ने छ । बनाइसकेपछि यो संरचनालाई हामीले ठिक ठाउँमा लिएर जानुपर्ने छ ।”