दार्चुला । दार्चुलाको व्याँस गाउँपालिका–२ दुम्लिङमा तुइन चुँडिएर महाकाली नदीमा खसेपछि एक युवक बेपत्ता भएका छन्।
बेपत्ता हुनेमा २८ वर्षीय नारायण बुढाथोकी रहेका छन्, जो दिउँसो करिब १२ बजे भारततर्फ जाँदै गर्दा दुर्घटनामा परेका हुन्।

जिल्ला प्रहरी कार्यालयका अनुसार नारायण बुढाथोकीसहित स्थानीय जितु बिष्ट (२६) र जयदु बुढाथोकी (४५) तुइनमार्फत महाकाली पार गर्ने प्रयासमा थिए।
जितु बिष्टले सुरक्षित रूपमा नदी पार गरे पनि नारायण तुइनको बीच भागमा हुँदा अचानक तुइन चुँडिएपछि नदीमा खसेका हुन्।

हाल घटनास्थलमा स्थानीय बासिन्दा र सुरक्षाकर्मीहरू मिलेर नारायणको खोजी कार्य जारी रहेको प्रहरीले जनाएको छ।