काठमाडौं । राष्ट्रियसभाको आजको बैठकमा सांसदहरूले उखु किसानलाई दिइँदै आएको अनुदान बढाउन माग गरेका छन् । उखु किसानलाई दिइँदै आएको अनुदान कटौती भएको विषयमा सांसदहरूले सरकारकाे ध्यानाकर्षण गराएका हुन् ।

आजको बैठकको शून्य समयमा सांसद गङ्गाकुमारी बेल्वासेले उखु किसानलाई विगतमा दिइँदै आएको अनुदानलाई निरन्तरता दिनुपर्ने बताइन् ।

सांसद गोपाल भट्टराईले बाढी र पहिरोका कारण अवरुद्ध छिमेकी देश चीनसँगको तातोपानी र रसुवागढी नाका चाँडो सञ्चालनमा ल्याउन पहल गर्न सरकारसँग माग गरे । उनले कोरला नाका सञ्चालनमा ल्याउनसमेत सरकारको ध्यानाकर्षण गराए ।

सांसद जगप्रसाद शर्माले सत्य निरूपण तथा बेपत्ता व्यक्तिको छानबिनका लागि कानून बनेको १ वर्ष भइसकेको अवस्थामा के कस्ता कार्य प्रगति भए भनेर जानकारी दिन माग गरे ।

सांसद तुलसाकुमारी दाहालले पछिल्लो समय महिला हिंसाका घटना बढ्दै गएको विषय उठाइन् । महिलाप्रतिको विभेद र हिंसाका घटनामा कमी ल्याउन सम्बन्धित निकायले पहल गर्नुपर्नेमा उनले जोड दिए ।

सांसद मायाप्रसाद शर्माले गाडीमा इम्बोस्ड नम्बर प्लेट जडान गर्न चर्को शुल्क तोकिएको गुनासो गरे । नेपाली अक्षरको गाडी नम्बर प्लेट राख्न आवश्यक रहेको उनको भनाइ थियो ।

सांसद शारदादेवी भट्टले वर्षायामसँगै डेङ्गी, मलेरिया, हैजालगायतका महामारीको जोखिम बढेको विषयमा सरकारको ध्यानाकर्षण गराए ।

सांसद सुमित्रा बिसीले नेपालको भूमि लिपुलेक नाकाबाट भारत र चीनले व्यापारिक नाका खोल्ने गरी सहमति गरेका विषयमा सरकारले यस विषयलाई कूटनीतिक ढङ्गले समाधान गर्नुपर्ने धारणा राखिन् ।