दोहा । इजरायलका केन्द्रीय निर्वाचन समितिका अध्यक्ष न्यायाधीश नोआम सोहलबर्गले आफ्नो पत्रमा ‘शिन बेट’ अर्थात इजरायली आन्तरिक सुरक्षा सेवाका प्रमुख डेभिड जिनीलाई निर्वाचन धाँदलीका बारेमा अनुसन्धान गर्न निर्देशन दिएका छन् ।

उनले निर्देशन दिँदै भनेका छन्, “यी शंकाहरूको अनुसन्धान गर्न आफ्नो शक्तिले भ्याएसम्म सबै प्रयास गर्नुहोस्। ‘शिन बेट’ को अधिकार प्रयोग गरी यस्ता प्रमाणहरू पत्ता लगाउनुहोस्, जसले यी शंकाहरूलाई पुष्टि वा खण्डन गर्न सकून्। यसरी मात्र हामी निर्वाचन प्रक्रियाप्रति जनविश्वास र लोकतान्त्रिक पद्धतिको निष्ठा सुनिश्चित गर्न सक्छौं।”

‘के गैरकानूनी माध्यमबाट अरब मतदाताहरूलाई परिचालन गरिँदै छ ?’ भन्ने प्रश्न उठे पछि उनले यस्ताे निर्देशन दिएका हुन् । सर्वोच्च अदालतका न्यायाधीशले एक साताभित्र अनुसन्धानका निष्कर्षहरू पेस गर्न निर्देशन दिएका छन्।

बिहीबार प्राप्त निर्वाचनको लगभग अन्तिम नतिजाअनुसार, प्रधानमन्त्री बेन्जामिन नेतान्याहुलाई समर्थन गर्ने गठबन्धनले १२० सदस्यीय ‘नेसेट’ (संसद) मा ५३ सिट जितेको छ। त्यस्तै, जियोनिस्ट विपक्षी समूहले ४८ सिट र अरब दलहरूले अभूतपूर्व रूपमा १९ सिट प्राप्त गरे पछि याे नयाँ बहस सुरू भएकाे हाे ।

सुरक्षा निकाय र केन्द्रीय निर्वाचन आयोगका विभिन्न स्रोतहरूलाई उद्धृत गर्दै हिब्रू भाषाका सञ्चारमाध्यमहरूले जनाए अनुसार कतारले गैरकानूनी माध्यमबाट अरब मतदाताहरूलाई परिचालन गर्ने प्रयास गरेको आशंका गरिएको छ। यसका लागि कतारले अरब संगठनहरूलाई ठूलो रकम पठाएको बताइएको छ, जसको उद्देश्य मतदानमा सहभागिता र भोटिङ प्रक्रियालाई प्रभावित पार्नु थियो।

‘च्यानल १२’ का अनुसार यी संगठनहरूलाई रकम पठाउन प्रयोग गरिएका माध्यमहरू विगतमा आतंकवादी गतिविधिमा फन्डिङ गर्न प्रयोग गरिएका माध्यमहरूसँग धेरै हदसम्म मिल्दाजुल्दा थिए।

‘च्यानल १२’ को दाबीभन्दा भिन्न कुरा गर्दै केही अधिकारीहरूले ‘वाइनेट’ र सार्वजनिक प्रसारण संस्था ‘कान’ लाई बताएअनुसार कतारद्वारा गरिएको भनिएको चुनावी हस्तक्षेप अन्य रिपोर्टहरूमा दाबी गरिएभन्दा निकै सानो स्तरको छ।

“यो विषय बाहिर चर्चा गरिएजस्तो ठूलो होइन। यस्तो घटना पहिले नभएको पनि होइन, फरक यति मात्र हो कि, यसपटक प्रमाणको मात्रा यस्तो स्तरमा पुग्यो, जसका लागि अनुसन्धान आवश्यक देखियो,” ‘गैर-राजनीतिक’ भनी चिनिएका ती स्रोतले ‘वाइनेट’ समाचार साइटलाई बताए।

कथित चुनावी धाँधलीबारे ‘शिन बेट’ले गरिरहेको अनुसन्धानको विवरणबारे जानकारी राख्ने स्रोतहरूले ‘कान’लाई बताएअनुसार अनुसन्धानको दायरामा रहेका शंकास्पद विषयहरू निकै सीमित छन्।

ठीक दुई दिनअघि निर्वाचनकै दिन जिनीले भनेका थिए, “इजरायलका नागरिकहरूलाई म पूर्ण विश्वासका साथ भन्न सक्छु कि, निर्वाचनको निगरानी भइरहेको छ र यो उचित तथा उत्साहजनक ढंगले सञ्चालन भइरहेको छ।”

इजरायली प्रहरी आयुक्त ड्यानी लेभी ले बिहीबार बिहान एक विज्ञप्तिमा भने, “निर्वाचनको निष्पक्षतासँग सम्बन्धित कुनै पनि उजुरी वा कसूर भएको शंका लागेमा, त्यसको पूर्ण र निष्पक्ष रूपमा छानबिन तथा अनुसन्धान गरिनेछ।”

“हामी कसैलाई पनि निर्वाचनको निष्पक्षता र लोकतान्त्रिक प्रक्रियामा आँच आउन दिने छैनौं। यदि कुनै कसूर भएको शंका लागेमा, प्रहरीले दृढतापूर्वक सत्यतथ्यको अनुसन्धान गर्नेछ र संलग्न व्यक्तिहरूलाई बिनाकुनै अपवाद कानूनी दायरामा ल्याउनेछ।”